آڈیو لیکس، چیف جسٹس پاکستان کیخلاف مہم پر بننے والی جے آئی ٹی کے ٹی او آر طلب

آڈیو لیکس سے متعلق کیس میں اسلام آباد ہائی کورٹ نے چیف جسٹس پاکستان کے خلاف مہم پر بننے والی جے آئی ٹی کے ٹی او آر طلب کر لیے۔

آڈیو لیکس سے متعلق اسلام آباد ہائی کورٹ میں 2 درخواستیں یکجا کر کے سماعت ہوئی۔

بشریٰ بی بی اور سابق چیف جسٹس کے بیٹے نجم الثاقب کی درخواستوں پر اسلام آباد ہائی کورٹ کے جسٹس بابر ستار نے سماعت کی۔

عدالت نے پیمرا، پی ٹی اے، آئی بی اور ایف آئی اے کی متفرق درخواستوں پر بھی سماعت کی۔

جسٹس بابر ستار کے کیس سننے پر اعتراض کی تینوں درخواستیں دائر کی گئی تھیں۔

پیمرا، پی ٹی اے، آئی بی، ایف آئی اے کی درخواستیں جرمانے کیساتھ خارج

جسٹس بابر ستار نے پیمرا، پی ٹی اے اور آئی بی کے ساتھ ایف آئی اے کی متفرق درخواستیں 5 ،5 لاکھ روپے کے جرمانے کے ساتھ خارج کر دیں۔

اسلام آباد ہائی کورٹ نے ایف آئی اے کی متفرق درخواست جرمانے کے ساتھ خارج کرتے ہوئے ڈی جی ایف آئی اے کے خلاف توہین عدالت کی کارروائی کا عندیہ دے دیا۔

جسٹس بابر ستار نے کہا کہ ڈی جی ایف آئی اے کے خلاف توہین عدالت کی کارروائی بھی شروع ہو سکتی ہے۔

آئی بی کے جوائنٹ ڈائریکٹر جنرل ذاتی حیثیت میں طلب

اسلام آباد ہائی کورٹ نے انٹیلیجنس بیورو کے جوائنٹ ڈائریکٹر جنرل کو ذاتی حیثیت میں طلب کر لیا۔

جسٹس بابر ستار نے کہا کہ انٹیلیجنس بیورو کی متفرق درخواست کس کی منظوری سے دائر ہوئی ہے؟ 

ایڈیشنل اٹارنی جنرل نے کہا کہ جوائنٹ ڈائریکٹر جنرل انٹیلیجنس بیورو نے منظوری دی ہے۔

جسٹس بابر ستار نے سوال کیا کہ اُن کا کوئی نام ہو گا، والدین نے کوئی نام رکھا ہو گا۔

ایڈیشنل اٹارنی جنرل نے جواب دیا کہ طارق محمود نام ہے۔

جسٹس بابر ستار نے کہا کہ آئندہ سماعت پر وہ خود پیش ہوں۔

پہلے تو متفرق درخواستیں طے ہوں گی: جسٹس بابر ستار

جسٹس بابر ستار نے کہا کہ متفرق درخواستیں دائر ہوئی ہیں پہلے یہ سن لیتے ہیں، پہلے تو متفرق درخواستیں طے ہوں گی، کس نے درخواستیں فائل کی ہیں؟ ان کا فیصلہ کرنا ہے۔

اٹارنی جنرل عثمان منصور اعوان نے کہا کہ آئی بی، ایف آئی اے اور پی ٹی اے نے یہ درخواستیں دائر کی ہیں۔

جسٹس بابر ستار نے کہا کہ جو درخواستیں آئی ہیں ان کو سن کر فیصلہ کروں گا، آئی بی، ایف آئی اے، پی ٹی اے سیریس ادارےہیں ان کی درخواستیں سن کر فیصلہ کیا جائے گا، انہوں نے درخواستیں دائر کیں اب میں انہیں سنوں گا، کس نے ان کو درخواستیں دائر کرنے کی اتھارٹی دی ہے؟

ایڈیشنل اٹارنی جنرل منور اقبال دوگل نے کہا کہ ڈی جی ایف آئی اے نے اسسٹنٹ ڈائریکٹر کو اتھارٹی دی۔

جسٹس بابر ستار نے کہا کہ درخواست کا متعلقہ حصہ پڑھیں جہاں مجھ پر اعتراض کیا گیا ہے۔

ایڈیشنل اٹارنی جنرل نے کہا کہ ایف آئی اے نے کیس دوسری عدالت منتقل کرنے کی استدعا کی ہے، اعتراض ہے ہائی کورٹ کے 6 ججز نے سپریم جوڈیشل کونسل کو خط لکھا ہے، جسٹس بابر ستار سمیت 6 ججز نے انٹیلیجنس ایجنسیز کی عدلیہ میں مداخلت کا خط لکھا۔

عدالت نے ایڈیشنل اٹارنی جنرل منور اقبال دوگل کو خط کا متعلقہ حصہ پڑھنے کی ہدایت کی۔

جسٹس بابر ستار نے کہا کہ جسٹس شوکت صدیقی کے جو الزامات ہیں اس عدالت کے ججز ان کو سپورٹ کر رہے ہیں، اس عدالت کے ججز نے کہا وہ جسٹس شوکت صدیقی کے الزامات کی تحقیقات کرنے کو سپورٹ کرتے ہیں، آپ نے خط کا جو حصہ پڑھا یہ آئی ایس آئی سے متعلق ہے ایف آئی اے سے متعلق نہیں؟

ایڈیشنل اٹارنی جنرل منور اقبال دوگل نے کہا کہ جی بالکل ایسا ہی ہے۔

جسٹس بابر ستار نے اٹارنی جنرل سے استفسار کیا کہ کیا ایف آئی اے انٹیلیجنس ایجنسی ہے؟

ایڈیشنل اٹارنی جنرل منور اقبال دوگل نے بتایا کہ ایف آئی اے انٹیلیجنس ایجنسی نہیں ہے۔

جسٹس بابر ستار نے استفسار کیا کہ کیا ہائی کورٹ کے ججز کو بلیک میل کرنے سے ایف آئی اے کا کوئی تعلق ہے؟

ایڈیشنل اٹارنی جنرل نے کہا کہ ایسا تو نہیں ہے لیکن خط میں لفظ انٹیلیجنس ایجنسیز استعمال کیا گیا ہے۔

جسٹس بابر ستار نے استفسار کیا کہ کیا ایف آئی اے کا ججز کے گھروں میں خفیہ کیمرے لگانے سے کوئی تعلق ہے؟

ایڈیشنل اٹارنی جنرلنے کہا کہ نہیں ان کا تعلق تو نہیں ہے، ایک پٹیشن میں ایجنسیز کے کردار سے متعلق بات کی گئی ہے اس لئے میں کہہ رہا ہوں۔

جسٹس بابر ستار نے کہا کہ اگر ایگزیکٹو ججز کو بلیک میل کرے؟ تو کیا ججز کا مفادات کا ٹکراؤ ہو جائے گا؟ مفادات کے ٹکراؤ کی کیا آپ اس طرح تعریف کریں گے؟

عدالت نے عندیہ دیتے ہوئے کہا کہ پیمرا، پی ٹی اے اور ایف آئی اے کی اتھارٹیز کے خلاف توہین عدالت کی کارروائی بھی شروع ہو سکتی ہے۔

جسٹس بابرستار نے  ایڈیشنل اٹارنی جنرل منور اقبال دوگل سے مکالمہ کرتے ہوئے کہا کہ کیس دوسری عدالت منتقل کرنے کی متفرق درخواستیں دائر کرنے کا مقصد عدالتی کارروائی کو شرمندہ کرنا ہے، ہم اور آپ ایک ہی دنیا میں رہتے ہیں بالکل سمجھ رہے ہیں، اگر ایگزیکٹو ججز کو دھمکائے اور ججز توہین عدالت کی کارروائی شروع کریں تو وہ مفاد کا ٹکراؤ کیسے ہے؟ کیا جج ذاتی مفاد کے لیے توہین عدالت کی کارروائی کرے گا؟ کیا عدالت آئی بی اور ایف آئی اے کے سارے کیس سننا چھوڑ دے؟ آپ کی دلیل مان لی جائے تو پھر تو حکومت کے خلاف کوئی کیس ہی نہیں سننا چاہیے۔

’’درخواستیں دائر کرنے پر ان سب کی جیبوں سے جرمانہ لیا جائے‘‘

سابق ایڈووکیٹ جنرل اسلام آباد جہانگیر خان جدون نے روسٹرم پر آ کر کہا کہ میں اس کیس میں وکیل نہیں لیکن کچھ کہنا چاہتا ہوں، فضول اور غیرسنجیدہ درخواستیں دائر کرنے پر ان سب کی جیبوں سے جرمانہ لیا جائے، قومی خزانے سے یہ رقم ادا نہیں کی جانی چاہیے، یہ سلسلہ اب بند ہونا چاہیے۔

آڈیو لیکس کیس میں عدالتی معاون بیرسٹر اعتزاز احسن نے کہا کہ مجھے خوشی ہے اب ججز کہہ رہے ہیں enough is enough۔

عدالتی معاون بیرسٹر اعتزاز احسن نے دوران دلائل ایگری کلچر ڈیپارٹمنٹ کا نام لیا۔

جسٹس بابر ستار نے استفسار کیا کہ آپ کس کی بات کر رہے ہیں، یہاں بہت سارے ایگری کلچرڈ یپارٹمنٹس ہیں؟

بیرسٹر اعتزاز احسن نے کہا کہ میں پنجاب ایگری کلچر ڈیپارٹمنٹ کی بات کر رہا ہوں۔

’’ایسا لگتا ہے عدلیہ نے اسٹینڈ لینے کا فیصلہ کر لیا ہے‘‘

عدالتی معاون اعتزاز احسن نے کہا کہ ایسا لگتا ہے عدلیہ نے اسٹینڈ لینے کا فیصلہ کر لیا ہے، عدلیہ کو الیکشن 90 دن کے اندر نہ ہونے پر اسٹینڈ لینا چاہیے تھا، اب بھی وقت ہے کہ ہم کھڑے ہو جائیں اور اپنا ہاؤس اِن آرڈر کریں، میں پارلیمان کی سُپر میسی جبکہ آئین کی سُپرمیسی پر یقین رکھتا ہوں، عدالت کا کام جائز یا ناجائز قرار دینا ہے اور اس آرڈر پر عمل ہو گا۔

اعتزاز احسن نے سپریم کورٹ میں جاری فوجی عدالتوں میں سویلینز کے ٹرائل کے خلاف کیس کا حوالہ دیا۔

جس پر  جسٹس بابر ستار نے کہا کہ آپ اُس کیس کا ریفرنس یہاں نہ دیں، کوئی اور ریفرنس آپ کے پاس ہے تو وہ دے دیں۔

بیرسٹر اعتزاز احسن نے کہا کہ نواز شریف، مریم نواز اور آصف زرداری کی آڈیو سامنے آتی رہی ہیں، یہ عوامی دلچسپی کا معاملہ ہے ایف آئی اے کو خود سے ایکشن لینا چاہیے۔

کیس کی سماعت ملتوی 

جسٹس بابرستار نے کہا کہ اعتزاز صاحب آج یہیں روکتے ہیں، آپ آئندہ سماعت پر عدالت کی معاونت کریں، اگر آپ چاہیں تو تحریری طور پر بھی جمع کرا سکتے ہیں۔

جسٹس بابر ستار نے کہا کہ بےنظیر بھٹو کیس کے مطابق کسی کی بھی جاسوسی غیرقانونی ہے، کیا یہ عدالت صرف ایک ڈیکلریشن دے دے اور فیڈریشن اس کی خلاف ورزی کرتی رہے؟ کل کوئی درخواست آتی ہے اور فیڈریشن آ کر کہہ دیتی ہے کہ ہم نے نہیں کیا تو کیا ہو گا؟ اعتزاز احسن صاحب اس نکتے پر عدالت کی معاونت کریں۔

عدالت نے کہا کہ جو جے آئی ٹی چیف جسٹس پاکستان کے خلاف کمپین پر بنی تھی وہ آڈیو لیکس معاملہ کیوں نہیں دیکھ سکتی؟

عدالت نے کیس کی سماعت ملتوی کرتے ہوئے کہا کہ آئندہ سماعت کی تاریخ تحریری حکم نامے میں شامل ہو گی۔