فرمان الہی
نماز کے اوقات
تحریک انصاف کے رہنما اسد قیصر نے کہا ہے کہ شہباز شریف کی ایپکس کمیٹی میں گفتگو کی شدید الفاظ میں مذمت کرتے ہیں، ابھی بھی ہماری لیڈرشپ خیبرپختونخوا میں متحرک ہے۔
وزیراعظم شہباز شریف کی ایپکس کمیٹی کے اجلاس میں گفتگو پر ردعمل دیتے ہوئے اسد قیصر نے کہا کہ انہیں خیبرپختونخوا پولیس سے متعلق ایسی گفتگو سے گریز کرنا چاہیے تھا۔
اسد قیصر بولے کہ دہشتگردی سے سب سے زیادہ صوبہ خیبرپختونخوا متاثر ہوا، تحریک انصاف کے دور میں دہشتگردی پر مؤثر انداز میں قابو پایا گیا۔
پی ٹی آئی رہنما نے کہا کہ ہمارے دور میں بم دھماکے، خودکش حملے یا دہشتگردی کے واقعات نہیں ہوئے۔
انہوں نے کہا کہ دہشتگردی سے متعلق تحریک انصاف کی پالیسی کامیاب رہی۔
اسد قیصر نے کہا کہ پی ٹی آئی خیبرپختونخوا کی قیادت بڑھتی دہشتگردی سے متعلق مسلسل آگاہ کر رہی ہے۔
تحریک انصاف کے رہنما نے کہا کہ حکومت کی توجہ دہشتگردی کے خاتمے پر بالکل بھی مرکوز نہیں ہے، امپورٹڈ حکومت کا رویہ فسطائیت پر مبنی ہے، یہ مخالفین کو دبانے کی کوشش کر رہے ہیں۔
اسد قیصر نے کہا کہ امپورٹڈ حکومت نے خیبرپختونخوا کے فنڈز روک لیے، 230 ارب روپے واجب الادا ہیں۔
قومی اسمبلی کے سابق اسپیکر نے مزید کہا کہ ملک کے مسائل حل کرنے کے لیے کام کرنے کی ضرورت ہے، پاکستان کی بہتری کے لیے ذاتی رنجشیں بھلانے کو تیار ہیں، حکومت سنجیدگی کا مظاہرہ کرے۔
