گھریلو جھگڑوں سے تنگ آکر نواز الدین ہوٹل منتقل ہوگئے

07 فروری ، 2023

ماں مہر النساء صدیقی اور اہلیہ عالیہ صدیقی کے درمیان جائیداد پر جھگڑے سے تنگ آکر بالی ووڈ کے ورسٹائل اداکار نواز الدین ہوٹل منتقل ہوگئے۔

بھارتی میڈیا رپورٹس کے مطابق نواز الدین کے والد سے منسوب ان کے خوابوں کا گھر جس میں 6 بیڈرومز، 2 بڑے ہال اور باغ بانی کیلئے 2 کشادہ لان ہیں اب ان کی والدہ اور اہلیہ کے جھگڑے کے باعث کسی ڈراؤنے خواب کا منظر پیش کر رہا ہے۔

میڈیا کے مطابق نواز الدین کے دوست کا کہنا ہے کہ اداکار جائیداد کو لے کر ہونے والے گھریلو جھگڑوں سے تنگ آکر اس وقت تک کے لئے ہوٹل منتقل ہوگئے ہیں جب تک ان کے وکیل اس معاملے کو قانونی طور پر سُلجھا نہ لیں۔

واضح رہے کہ یہ خبر نواز الدین کی اہلیہ عالیہ صدیقی کی جانب سے اداکار اور ان کی والدہ پر ہراسانی اور بنیادی سہولتوں کی عدم دستیابی کے الزامات عائد کرنے کے بعد سامنے آئی ہے کہ اس میں نواز الدین شامل نہیں کیونکہ وہ گھر پر موجود ہی نہیں ہیں۔

یاد رہے کہ نواز الدین کی والدہ مہرونسہ صدیقی نے جائیداد کے تنازع پر اپنی بہو عالیہ صدیقی کے خلاف مقدمہ درج کروایا تھا، ان کے مطابق نواز الدین اور عالیہ کی طلاق ہو چکی ہے اس لئے ان کا جائیداد پر کوئی حق نہیں۔

خیال رہے کہ عالیہ نواز الدین کی دوسری بیوی ہیں، اُن کا اصل نام انجنا کشور پانڈے ہے، دونوں نے ایک دہائی قبل شادی کی تھی، عالیہ اور نواز الدین صدیقی کے دو بچے بیٹا یانی صدیقی اور بیٹی شوریٰ صدیقی ہیں۔ تاہم عالیہ نے 2020 میں اداکار سے علیحدگی اختیار کرنے کے لئے انہیں قانونی نوٹس بھیجوایا تھا جو بعدازاں 2021 میں واپس لے لیا تھا۔

انٹرٹینمنٹ سے مزید