وزیراعظم یوتھ لون اسکیم کی کارکردگی جانچنے کیلئے اسٹیئرنگ کمیٹی قائم

وزیراعظم یوتھ لون اسکیم کی کارکردگی اور رفتار جانچنے کیلئے اسٹیئرنگ کمیٹی قائم کر دی گئی، جس کی  سربراہی وزیراعظم شہباز شریف کریں گے۔

وزیراعظم نے کہا کہ 30 جون تک 30 ارب روپے کے قرضوں کی فراہمی کا ہدف پورا کیا جائے۔

وزیراعظم نے نوجوان قرضہ اسکیم سے متعلق آپریشنل مسائل کو ترجیحی بنیادوں پر حل کرنے کی ہدایت دی۔

انہوں نے کہا کہ حکومت نوجوانوں میں انٹرپرینیورشپ اور روزگار کیلئے اقدامات کر رہی ہے۔

وزیراعظم کا کہنا تھا کہ نوجوانوں کو آسان شرائط پر قرضوں کی فراہمی بھی یقینی بنائی جا رہی ہے۔

انہوں نے کہا کہ نوجوان آبادی کی فلاح و بہبود سے ملکی ترقی جڑی ہوئی ہے، وسائل فراہم کیے جائیں تو ہمارے نوجوان ملکی تقدیر بدل سکتے ہیں۔

وزیراعظم نے مزید کہا کہ چیلنجز سے نمٹنے کیلئے حکومتی اور نجی شعبوں کو ہم آہنگ کیا جائے۔