فرمان الہی
نماز کے اوقات
نامور بھارتی اداکار نواز الدین صدیقی کی اہلیہ عالیہ صدیقی نے اپنی ساس پر سنگین نوعیت کا الزام عائد کردیا۔
ایک حالیہ انٹرویو کے دوران عالیہ صدیقی نے دعویٰ کیا کہ نواز الدین کی والدہ نے میرے دو سالہ بیٹے کو ناجائز کہا اور ان کی اس بات سے میں بھی پریشان رہی۔
واضح رہے کہ عالیہ کا بیان ایسے وقت میں سامنے آیا ہے کہ جب بمبئی ہائی کورٹ نے دونوں کو ان کے بچوں کے حوالے سے معاملات کو خوشگوار ماحول میں نمٹانے کا کہا۔
نواز الدین صدیقی عدالت پہنچے اور درخواست دائر کی تھی کہ انہیں ان کے بچوں کی موجودگی کے بارے میں بتایا جائے جو اس وقت ان کی ناراض اہلیہ کے ساتھ موجود ہیں۔
حالیہ انٹرویو کے دوران عالیہ کا کہنا تھا کہ بلاشبہ میرا بچہ یہ بھی نہیں جانتا کہ والد ہوتا کیا ہے۔ میرے بچوں کو نواز الدین کا سایہ تک نہیں ملا۔
ان کا یہ بھی کہنا تھا کہ حتیٰ کہ جب ہم لوگ ساتھ میں رہتے تھے تب بھی نواز الدین بچوں پر توجہ نہیں دیتے تھے۔
جب ان سے سوال کیا گیا کہ کیا بچے تمام صوتحال کو جانتے ہیں؟ جس پر عالیہ نے جواب دیا کہ ہماری بیٹی 12 سال کی ہے اور وہ 2 سال کی عمر سے یہ سب کچھ دیکھ رہی ہے، جبکہ بیٹا ابھی بہت چھوٹا ہے۔
واضح رہے کہ عالیہ شوہر نواز الدین پر انہیں ریپ کا نشانہ بنانے کا بھی الزام عائد کرچکی ہیں۔
انہوں نے یہ بھی کہا تھا کہ نواز الدین کے خلاف اس معاملے میں پولیس کو درخواست بھی جمع کروادی ہے۔
