اٹلی کشتی حادثے میں 28 پاکستانیوں کی موت کی خبر غلط تھی، پاکستانی سفیر

28 فروری ، 2023

اٹلی میں پاکستانی سفیر علی جاوید نے کہا ہے کہ کشتی میں سوار 28 پاکستانیوں کی موت سے متعلق ابتدائی معلومات غیرمصدقہ تھیں۔

ایک بیان میں علی جاوید نے کہا کہ کشتی میں سوار 28 پاکستانیوں کی موت سے متعلق خبر واپس لے لی گئی تھی، کشتی میں سوار 16 پاکستانی محفوظ ہیں، 4 لاپتہ ہیں جن کی تلاش جاری ہے۔

اٹلی میں پاکستانی سفارتی عملے نے کشتی حادثے میں بچائے گئے 16 پاکستانیوں سے ملاقات کی ہے۔

سفیر علی جاوید نے کہا کہ سفارتخانے کی سینئر اہلکار نے میڈیکل کیمپ میں 16 پاکستانیوں سے ملاقات کی، کشتی حادثہ کلابریا میں جس مقام پر ہوا سفارتخانے سے 9 گھنٹے کی مسافت پر ہے، واقعے کی خبر ملتے ہی رات ہی کو سفارتخانے کے عملہ کو جائے وقوع پر بھیجا گیا۔

انہوں نے کہا کہ کشتی حادثے میں بچ جانے والے 16 پاکستانیوں کی حالت خطرے سے باہر ہے، حادثے میں بچ جانے والوں نے بتایا کہ کشتی میں 20 پاکستانی سوار تھے، کشتی حادثے میں لاپتہ 4 پاکستانیوں کی تلاش جاری ہے۔

سفیر پاکستان علی جاوید کا کہنا ہے کہ 16پاکستانیوں کا تعلق مالاکنڈ، حافظ آباد، گوجرانوالہ اور گجرات سے ہے، سفارتخانہ کشتی حادثے کے معاملے کو قریب سے دیکھ رہا ہے۔

ان کا یہ بھی کہنا ہے کہ سفارتخانہ 16 پاکستانیوں کی واپسی کے لیے اٹلی حکومت کے تعاون سے اقدامات کرے گا۔

قومی خبریں سے مزید