پنجاب: 40 شخصیات کو سول ایوارڈز دیے گئے

23 مارچ ، 2023

پنجاب کے گورنر ہاؤس میں یومِ پاکستان کے موقع پر سول ایوارڈز دینے کی تقریب منعقد ہوئی جس میں گورنر پنجاب محمد بلیغ الرحمٰن نے 40 شخصیات کو سول ایوارڈز دیے۔

عطاء الرحمٰن مرحوم اور ریاض شاہد مرحوم کو بعد از وفات ستارۂ امتیاز سے نوازا گیا جبکہ توقیر ناصر کو اداکاری، کرکٹر بابر اعظم کو کھیل کے شعبے میں ستارۂ امتیاز دیا گیا۔

مذہبی اسکالر علامہ محمد رضا ثاقب کو، شعبۂ نعت خوانی میں عبدالرؤف روفی کو، ادب اور شاعری میں شاکر شجاع آبادی کو ستارہ امتیاز سے نوازا گیا۔

اداکاری، پروڈکشن، ڈائریکشن میں سنگیتا اور پروڈکشن کے شعبے میں محمد حفیظ طاہر کو صدارتی ایوارڈ برائے حسنِ کارکردگی دیا گیا۔

افضال احمد مرحوم کو بعد از وفات صدارتی ایوارڈ برائے حسنِ کارکردگی سے نوازا گیا اور شعبۂ قوالی میں شیر میانداد کو بھی صدارتی ایوارڈ برائے حسنِ کارکردگی دیا گیا۔

شعبۂ ادب، شاعری میں فرحت عباس شاہ کو صدارتی ایوارڈ برائے حسن کارکردگی سے نوازا گیا جبکہ ادب کے شعبے میں نیلم احمد بشیر کو تمغۂ امتیاز سے نوازا گیا۔

ملک محمد سلیم احمد اور محمد اشرف حیدر احمد کو تمغۂ امتیاز سے نوازا گیا جبکہ طب کے شعبے میں ڈاکٹر نصرت اللّٰہ اور ڈاکٹر عقیل بابری کو تمغۂ امتیاز دیا گیا۔

قومی خبریں سے مزید