سپریم کورٹ میں فل بینچ بھی بن جائے ہمیں فرق نہیں پڑتا، عمران خان

پاکستان تحریک انصاف (پی ٹی آئی) کے چیئرمین عمران خان کا کہنا ہے کہ سپریم کورٹ میں فل بینچ بھی بن جائے ہمیں فرق نہیں پڑتا۔

چیئرمین پی ٹی آئی عمران خان سے سابق وزیر اعلیٰ پنجاب اور پی ٹی آئی کے صدر چوہدری پرویز الہٰی نے زمان پارک میں ملاقات کی۔

بینچ 5 ارکان کا ہو یا فل، فرق نہیں پڑتا، عمران

امپورٹڈ حکومت، ان کے ہینڈلر اور سمجھوتہ کرنے والا الیکشن کمیشن آئین کا مذاق اڑا رہے ہیں۔

دونوں رہنماؤں نے سپریم کورٹ میں زیر سماعت مقدمے پر تبادلہ خیال کیا۔

پی ٹی آئی چیئرمین عمران خان نے کہا کہ سپریم کورٹ میں فل بینچ بھی بن جائے ہمیں فرق نہیں پڑتا، آئین واضح طور پر کہتا ہے کہ الیکشن 90 روز میں ہونا چاہیے۔

چوہدری پرویز الہٰی نے کہا کہ ن لیگ عدلیہ تقسیم کرنے کی پالیسی پر عمل پیرا ہے، سپریم کورٹ کے خلاف سازش کا عوام بھرپور جواب دیں گے۔

سابق وزیر اعلیٰ نے کہا کہ آٹے کی لائنوں میں لوگ اپنی جانوں سے ہاتھ دھو رہے ہیں۔