فرمان الہی
نماز کے اوقات
پیپلز پارٹی کے چیئرمین اور وزیر خارجہ بلاول بھٹو زرداری نے کہا ہے کہ کراچی پر توجہ دیں تو عالمی مالیاتی ادارے (آئی ایم ایف) سے نجات مل سکتی ہے۔
کراچی میں کے فور منصوبے کے سنگ بنیاد کی تقریب سے خطاب میں بلاول بھٹو زرداری نے کہا کہ کراچی کے منصوبوں کو بھی شہباز اسپیڈ دلوائی جائے۔ ہم چاہتے ہیں کہ وزیراعظم شہباز شریف اسی طرح کراچی آتے رہیں۔
وزیر خارجہ نے کہا کہ میں خود بھی ٹینکر سے پانی خریدتا ہوں۔
پی پی چیئرمین نے مزید کہا کہ اسلام آباد میں بیٹھے لوگوں کو اندازہ ہی نہیں سیلاب سے کیا تباہی ہوئی، مون سون سے کراچی کے انفرااسٹرکچر کو بھی نقصان پہنچا ہے۔
اُن کا کہنا تھا کہ بلوچستان اور سندھ کے عوام کے لیے ڈی سیلینیشن کا نظام لانا ہوگا، شہباز شریف ہمارے وزیراعظم ہیں،آپ ہی ملک کے مسائل حل کریں گے۔
بلاول بھٹو زراری نے یہ بھی کہا کہ وزیراعظم کی کارکردگی کی وجہ سے ایک سال میں زمین آسمان کا فرق آچکا ہے،جب قائم علی شاہ وزیراعلیٰ تھے تو دو بار کےفور پر بریفنگ دی گئی۔
انہوں نے کہا کہ کراچی پر توجہ دیں تو آئی ایم ایف سے نجات مل سکتی ہیں ، ملک کا سب سے غیرمقبول ادارہ واپڈا ہے، جس کی وجہ سے ہمارے ایم این ایز اور ایم پی ایز حلقوں میں نہیں جاسکتے۔
پی پی چیئرمین نے کہا کہ شرجیل میمن نے 2 سال جیل میں گزارے تھے، جس وقت پی پی رہنما گرفتار تھے تو چیف جسٹس گڈ ٹو سی کہنے جیل تک آجاتے تھے۔
اُن کاکہنا تھا کہ پوچھتا ہوں اگر 9 مئی کی سازش نائن زیرو یا بلاول ہاؤس میں تیار ہوتی تو کیا ردعمل ہوتا؟
بلاول بھٹو زرداری نے مزیدکہا کہ نہیں چاہتے مخالف یہ دن دیکھیں مگر اس سے پہلے 9 مئی جیسے واقعات نہیں دیکھے، جب ہم پچھلے سال اسلام آباد ریلی لے کر گئے توڑ پھوڑ کا ہم پر کوئی کیس نہیں بنا۔
انہوں نے یہ بھی کہا کہ ایک پاکستان ہے یا دو پاکستان ہیں؟ یہ تاریخ بتائے گی، وزیراعظم کے پاس فارن فنڈنگ کا فیصلہ آنے کے بعد سے ہی پابندی کا اختیار تھا۔
پی پی چیئرمین نے کہا کہ ہم آپ کی طرف دیکھ رہے ہیں آپ اپنی ایک ٹیم بنائیں جو ان مسائل کو حل کرے، جب ہم کسانوں کے ساتھ کھڑے ہوتے ہیں تو وہ پوری معیشت کو سنبھالتے ہیں۔
اُن کا کہنا تھا کہ ایم کیو ایم کے دوست جمہوریت کے ساتھ کھڑے ہوئے، ان کو زبردستی یہ دن دیکھنا پڑے، شروع میں ہم تو ان کے خلاف کیسز نہیں لائے ہم سیاسی انتقام کا تاثر نہیں دینا چاہتے تھے۔
بلاول بھٹو زرداری نے کہا کہ جب عمران خان کو عدالت بلایا جاتا ہے اور وہ نہیں جاتے تو جواب میں پی ٹی آئی زمان پارک کو میدان جنگ بنا دیتے ہیں۔
