نواز شریف سے پاکستان میں استحکام اور معیشت پر تفصیلی بات ہوئی، گورنر سندھ

گورنر سندھ کامران ٹیسوری کا کہنا ہے کہ نواز شریف سے پاکستان میں استحکام اور معیشت پر تفصیلی بات ہوئی، نواز شریف وطن واپسی کا فیصلہ خود کریں گے۔

کامران ٹیسوری نے لندن میں مسلم لیگ (ن) کے قائد نواز شریف سے ملاقات کے بعد میڈیا سے گفتگو کرتے ہوئے کہا کہ سابق وزیراعظم نواز شریف کو ڈاکٹر خالد مقبول صدیقی بھائی کا سلام پہنچایا ہے۔

انہوں نے کہا کہ نواز شریف پاکستان کو اس حالت تک پہنچانے والوں کا احتساب چاہتے ہیں۔

کامران ٹیسوری کا کہنا تھا کہ پاکستام کے استحکام کو نقصان پہنچانے، مہنگائی کو یہاں تک لانے والوں کا احتساب ہونا چاہیے۔

گورنر سندھ کی لندن میں سابق وزیراعظم نواز شریف سے ملاقات

گورنر سندھ سے نواز شریف کی ملاقات کے دوران سابق وزیراعظم شہباز شریف اور سینیٹر اسحاق ڈار بھی موجود تھے۔

گورنر سندھ نے بتایا کہ اسحاق ڈار کا کہنا ہے چیئرمین پی ٹی آئی کی حکومت نے معیشت کا برا حال کیا، نتیجہ آج دیکھ رہے ہیں۔

کامران ٹیسوری نے کہا کہ نواز شریف بجلی کے بحران اور بڑھتے بلز کے سبب بہت پریشان ہیں، ان سے سے پاکستان میں استحکام اور معیشت پر تفصیلی بات ہوئی۔

گورنر سندھ نے مزید کہا کہ پرویز الہٰی کی گرفتاری عدالت کا معاملہ ہے، اس پر تبصرہ نہیں کرسکتا۔