فرمان الہی
نماز کے اوقات
ڈی آئی جی سی ٹی ڈی فنانسنگ یونٹ عمران شاہد کا کہنا ہے کہ بھتہ خوری میں ملوث 2 اہم دہشت گردوں کو گرفتار کیا گیا ہے۔
عمران شاہد نے میڈیا سے گفتگو کرتے ہوئے بتایا کہ گرفتار دہشت گردوں کا تعلق کالعدم ٹی ٹی پی سے ہے۔
اُنہوں نے بتایا کہ گرفتار دہشت گرد زمان فیض اور سعید اللّٰہ افغانستان کے رہائشی ہیں اور اُنہیں لاہور سے گرفتار کیا گیا ہے۔
ڈی آئی جی سی ٹی ڈی نے بتایا کہ دہشت گردوں سے بھتہ خوری میں استعمال ہونے والے موبائل فونز بھی برآمد ہوئے۔
اُنہوں نے بتایا کہ دہشت گرد کاروباری اور دیگر افراد سے بھتہ مانگ رہے تھے اور نقصان کے ڈر سے کئی افراد بھتہ خوروں کا شکار بھی بن چکے ہیں لیکن متاثرہ افراد نے خوف کے باعث ان کے خلاف قانونی کارروائی سے گریز کیا۔
عمران شاہد نے بتایا کہ دہشت گرد ضلع مہمند میں کارروائیاں کرتے تھے، گرفتار ملزمان کے ساتھ دیگر 71 ساتھی بھی شامل ہیں۔
اُنہوں نے بتایا کہ یہ نیٹ ورک سیاست دانوں کو بھی بھتے کے لیے کالز کرنے میں ملوث ہے، گرفتار دہشت گردوں نے ایک سابق سینیٹر اور ایم پی اے کو بھی بھتے کی کال کی تھی۔
ڈی آئی جی سی ٹی ڈی نے بتایا کہ افغانستان کے نمبرز کا سی ڈی آر نکالنا مشکل ہوتا ہے، بھتہ خوری کے لیے دہشت گردوں نے 10 واٹس ایپ گروپس بنا رکھے ہیں۔
عمران شاہد نے یہ بھی بتایا کہ بھتہ خوری میں ملوث افغان شہریوں کا معاملہ دوبارہ افغان حکومت کے ساتھ اٹھائیں گے۔
