فرمان الہی
نماز کے اوقات
پاکستان کی نوبیل انعام یافتہ ملالہ یوسف زئی نے غزہ میں الاہلی اسپتال پر بمباری کی مذمت کی ہے۔
ملالہ یوسف زئی نے سوشل میڈیا اکاؤنٹ ایکس پر اپنا ایک ویڈیو پیغام شیئر کیا ہے جس میں اُنہوں نے غزہ کے الاہلی اسپتال پر اسرائیلی طیاروں کی بمباری کی مذمت کی ہے اور اس بمباری سے ہونے والے جانی نقصان پر گہرے دکھ کا اظہار کیا ہے۔
اُنہوں نے اپنا ویڈیو پیغام شیئر کرتے ہوئے کیپشن میں لکھا ہے کہ میں غزہ کے الاہلی اسپتال پر بمباری دیکھ کر خوفزدہ ہوں اور اس کی واضح الفاظ میں مذمت کرتی ہوں۔
ملالہ نے مزید لکھا ہے کہ میں اسرائیلی حکومت پر زور دیتی ہوں کہ وہ غزہ میں انسانی امداد کی اجازت دینے اور جنگ بندی کے مطالبے کا اعادہ کرے۔
انہوں نے اپنی پوسٹ کے آخر میں لکھا ہے کہ میں 3 خیراتی اداروں کو 300 ہزار ڈالرز دے رہی ہوں جو موجودہ صورتِ حال میں فلسطینیوں کی مدد کر رہے ہیں۔
واضح رہے کہ غزہ کے الاہلی اسپتال پر اسرائیلی طیاروں نے بمباری کی ہے جس کے نتیجے میں 500 سے زائد فلسطینی شہید ہو گئے ہیں، بمباری سے اسپتال کی عمارت مکمل طور پر تباہ ہوگئی ہے۔
فلسطینی وزارت صحت کے مطابق اسرائیلی طیاروں نے وسطی غزہ میں موجود اسپتال کو نشانہ بنایا جس میں 600 سے زائد افراد زخمی بھی ہوئے ہیں۔
فلسطینی حکام کے مطابق غزہ میں 7 اکتوبر سے جاری اسرائیلی جارحیت میں شہید فلسطینیوں کی تعداد 3 ہزار 500 سے تجاوز کر گئی ہے۔
فسلطینی وزارت صحت کا کہنا ہے کہ غزہ میں اسرائیلی حملوں سے 12 ہزار 500 افراد زخمی ہوئے ہیں، شہید ہونے والوں میں 1000 سے زائد بچے اور ہزار سے زائد خواتین شامل ہیں۔
