فرمان الہی
نماز کے اوقات
اقوامِ متحدہ کے سیکریٹری جنرل انتونیو گوتریس نے غزہ کے اسپتال پر حملے کی مذمت کی ہے۔
انتونیو گوتریس نے کہا ہے کہ غزہ کے اسپتال پر حملے میں سیکڑوں فلسطینیوں کی ہلاکت سے بہت دہشت زدہ ہوں۔
اسرائیلی جارحیت کے بعد انہوں نے اپنے بیان میں کہا ہے کہ میرا دل متاثرین کے اہلِ خانہ کے ساتھ ہے۔
سیکریٹری جنرل اقوامِ متحدہ انتونیو گوتریس کا یہ بھی کہنا ہے کہ اسپتالوں اور طبی عملے کو بین الاقوامی انسانی قانون کے تحت تحفظ حاصل ہے۔
علاوہ ازیں انتونیو گوتریس نے انسانی بنیادوں پر فوری سیز فائر کا مطالبہ کرتے ہوئے کہا ہے کہ مشرق وسطیٰ میں انسانی مشکلات کم کرنے کے لیے فوری سیز فائر کیا جائے۔
انتونیو گوتریس کا کہنا ہے کہ بے شمار زندگیاں اور پورے خطے کی قسمت غیر یقینی صورتحال سے دو چار ہے۔
واضح رہے کہ غزہ کے الاہلی اسپتال پر اسرائیلی طیاروں نے بمباری کی ہے جس کے نتیجے میں 500 سے زائد فلسطینی شہید ہوگئے ہیں، بمباری سے اسپتال کی عمارت مکمل طور پر تباہ ہوگئی ہے۔
فلسطینی وزارت صحت کے مطابق اسرائیلی طیاروں نے وسطی غزہ میں موجود اسپتال کو نشانہ بنایا جس میں 600 سے زائد افراد زخمی بھی ہوئے ہیں۔
فلسطینی حکام کے مطابق غزہ میں 7 اکتوبر سے جاری اسرائیلی جارحیت میں شہید فلسطینیوں کی تعداد 3 ہزار 500 سے تجاوز کر گئی ہے۔
فسلطینی وزارت صحت کا کہنا ہے کہ غزہ میں اسرائیلی حملوں سے 12 ہزار 500 افراد زخمی ہوئے ہیں، شہید ہونے والوں میں 1000 سے زائد بچے اور ہزار سے زائد خواتین شامل ہیں۔
