فرمان الہی
نماز کے اوقات
قطر کے امیر شیخ تمیم بن حمد آل ثانی کا کہنا ہے کہ غزہ پر اسرائیلی وحشیانہ بمباری اور ننگی جارحیت پر خاموش نہیں رہ سکتے، خطے میں امن صرف دو ریاستی حل کے ذریعے ہی ممکن ہے۔
قطر کے دارالحکومت دوحہ میں منعقدہ مجلسِ شوریٰ کے اجلاس سے خطاب کرتے ہوئے امیرِ قطر شیخ تمیم بن حمد آل ثانی نے کہا کہ غزہ میں جاری اسرائیلی وحشیانہ بمباری اور ننگی جارحیت میں شہریوں کو نشانہ نہ بنانے پر زور دیتے ہیں۔
انہوں نے کہا کہ بچوں کی زندگیوں کو نظرانداز کرنے کے سخت خلاف ہیں، فلسطینی انتہائی گمبھیر صورتِ حال میں زندگی بسر کرنے پر مجبور ہیں۔
امیرِ قطر کا مزید کہنا ہے کہ غزہ پر وحشیانہ بمباری اور ننگی جارحیت پر خاموش نہیں رہ سکتے ہیں، پانی، خوراک، ادویات کی پابندیوں کو بطور ہتھیار استعمال کرنا ناجائز ہے، اسرائیل کو قتلِ عام کی کھلی اجازت دینا کسی صورت میں قبول نہیں کریں گے۔
ان کا یہ بھی کہنا ہے کہ فلسطینیوں کی زمینوں پر جاری قبضوں کو نظر انداز کرنا ناقابلِ قبول ہے، خطے میں امن صرف دو ریاستی حل کے ذریعے ہی ممکن ہو سکتا ہے۔
