فرمان الہی
نماز کے اوقات
انٹرنیشنل کرکٹ کونسل (آئی سی سی) ورلڈکپ 2023ء کے 29ویں میچ میں بھارت نے انگلینڈ کو 100 رنز سے شکست دے کر سیمی فائنل میں جگہ پکی کرلی۔
لکھنو میں کھیلے گئے میچ میں دفاعی چیمپئن انگلینڈ کی ٹیم 230 رنز کے ہدف کے تعاقب میں بھارتی بولنگ کا مقابلہ نہ کرسکی اور 129 رنز پر ڈھیر ہوگئی۔
انگلینڈ کی طرف سے لیام لیونگسٹن 27، ڈیوڈ ملان 16، معین علی 15، جونی بیرسٹو 14، جوز بٹلر اور کرس ووکس 10، 10 رنز بناکر پویلین لوٹ گئے۔
واضح رہے کہ انگلینڈ کی میگا ایونٹ میں یہ لگاتار چوتھی جبکہ مجموعی طور پر پانچویں شکست ہے۔ یوں انگلینڈ کے سیمی فائنل میں پہنچنے کے امکانات نہ ہونے کے برابر رہ گئے ہیں۔
بھارت کی طرف سے محمد شامی نے 7 اوورز میں 22 رنز دے کر 4، جسپریت بمہرا نے 32 رنز دے کر 3 وکٹ اپنے نام کیے جبکہ کلدیب یادیو نے 8 اوورز میں 24 رنز دے کر 2 وکٹیں حاصل کیں۔
اس سے قبل انگلینڈ نے ٹاس جیت کر بھارت کے خلاف پہلے بولنگ کروانے کا فیصلہ کیا تھا۔
بھارتی ٹیم آج کے میچ میں شروع سے ہی انگلش بولنگ کے سامنے دباؤ کا شکار رہی، ابتدائی 3 کھلاڑی صرف 40 رنز پر پویلین لوٹ گئے تھے۔
شبمن گل 9، ویرات کوہلی صفر اور سریش ائیّر 4 رنز بنا کر میدان چھوڑ گئے۔ اس کے بعد کپتان روہت شرما نے کے ایل راہول کے ساتھ مل کر اننگز کو آہستہ آہستہ آگے بڑھایا تھا۔
دونوں کھلاڑیوں نے 91رنز کی شراکت قائم کی، اس دوران سیٹ بیٹر کے ایل راہول بڑا شارٹ کھیلنے کی کوشش میں اپنی وکٹ گنوا بیٹھے، انہوں نے 58 گیندوں پر 39 رنز کی باری کھیلی۔
164 کے مجموعے پر بھارت کے پانچویں آؤٹ ہونے والے بیٹر کپتان روہت شرما تھا، جو 101 گیندوں پر 87 رنز کی اننگز کھیل کر عادل رشید کی وکٹ بن گئے۔
بھارت کی طرف سے رویندرا جدیجا 8، محمد شامی 1 اور سوریا کمار یادیو 49 رنز بناکر آؤٹ ہوئے تو ٹیم کے 8 کھلاڑی صرف 208 رنز پر پویلین لوٹ گئے تھے۔
اننگز کی آخری گیند پر جسپریت بمرا 16 کے انفرادی اسکور پر رن آؤٹ ہوگئے، یوں بھارتی ٹیم مقررہ 50 اوورز میں 9 وکٹ پر صرف 229 رنز ہی بناسکی۔
انگلینڈ کی طرف سے ڈیوڈ ویلی نے 3، کرس ووکس اور عادل رشید نے 2، 2 بھارتی کھلاڑیوں کو میدان بدر کیا۔
ٹاس کے بعد گفتگو کرتے ہوئے انگلینڈ ٹیم کے کپتان جوز بٹلر کا کہنا تھا کہ گزشتہ میچ کھیلنے والی ٹیم کو آج کے میچ کے لیے برقرار رکھا ہے۔
بھارتی ٹیم کے کپتان روہت شرما کا اس موقع پر کہنا تھا کہ وکٹ بیٹنگ کے لیے اچھی دکھ رہی ہے اور ہم بھی ٹاس جیت کر پہلے بیٹنگ ہی کرتے، ٹیم میں کوئی تبدیلی نہیں کی ہے۔
