فرمان الہی
نماز کے اوقات
اسپیکر قومی اسمبلی راجہ پرویز اشرف نے غزہ کے جبالیہ پناہ گزین کیمپ پر اسرائیلی بم باری کی مذمت کی ہے۔
ایک بیان میں راجہ پرویز اشرف نے کہا ہے کہ غزہ کے جبالیا پناہ گزین کیمپ پر اسرائیلی فورسز کی بم باری کی شدید مذمت کرتا ہوں۔
اُنہوں نے کہا کہ وحشیانہ بم باری کے نتیجے میں 100 سے زائد نہتے شہریوں کی شہادت انتہائی افسوس ناک ہے، اسرائیل نے ظلم کی تمام حدیں پار کر دی ہیں، اسرائیلی مظالم سے خواتین، بچے اور امدادی کارکنان تک محفوظ نہیں۔
اسپیکر قومی اسمبلی نے کہا ہے کہ غزہ پر اسرائیلی بم باری سے اقوامِ متحدہ کے 64 امدادی کارکن ہلاک ہو چکے ہیں، مغربی طاقتوں کی ایماء پر اسرائیل کی غزہ پر وحشیانہ بمباری کا سلسلہ فوری بند ہونا چاہیے۔
اُنہوں نے کہا کہ اب وقت آگیا ہے کہ امت مسلمہ کو متحد ہو کر اسرائیل کی بربریت کا جواب دینا ہو گا۔
راجہ پرویزاشرف نے کہا کہ پاکستانی پارلیمان اور عوام عالمی برادری سے پُر زور اپیل کرتے ہیں کہ اسرائیلی بربریت کا نوٹس لے، جنگ کسی مسئلے کا حل نہیں، عالمی طاقتوں کو بیٹھ کر مسئلہ فلسطین کا فوری اور دیرپا حل نکالنا چاہیے۔
اُنہوں نے کہا کہ معصوم بچوں، خواتین اور بزرگوں کو اسرائیلی مظالم سے نجات دلانا پوری دنیا کی اجتماعی ذمے داری ہے، پاکستان فلسطینی بہن بھائیوں کی سیاسی اور اخلاقی مدد جاری رکھے گا۔
اسپیکر قومی اسمبلی نے دعا کی کہ اللّٰہ تعالیٰ مظلوم فلسطینیوں پر اپنا رحم فرمائے اور ظالموں کو نشانِ عبرت بنائے۔
