فرمان الہی
نماز کے اوقات
ترک صدر رجب طیب اردوان نے کہا ہے کہ غزہ پر اسرائیلی بمباری پر دنیا کی خاموشی شرمناک ہے۔
ریاض میں اسلامی تعاون تنظیم (او آئی سی) اور عرب لیگ کے مشترکہ ہنگامی اجلاس سے خطاب کرتے ہوئے ترک صدر کا کہنا تھا کہ غزہ پر اسرائیل کے حالیہ ظلم اور تشدد کی تاریخ میں مثال نہیں ملتی۔
انہوں نے کہا کہ غزہ کی صورتحال پر مشترکہ عرب اسلامی اجلاس بلانے پر محمد بن سلمان کے شکر گزار ہیں۔ غزہ میں بچوں کی بکھری لاشیں دیکھ کر دل خون کے آنسو روتا ہے۔
انکا کہنا تھا کہ اسرائیلی قابض فوج نے فلسطینیوں پر ظلم کی انتہا کردی، فلسطین میں ہونے والے اسرائیلی مظالم کبھی نہیں بھولیں گے۔
طیب اردوان نے کہا کہ پیرس میں چند افراد کی ہلاکت پر عالمی برادری متحد ہوگئی تھی۔ غزہ پر اسرائیلی بمباری پر دنیا کی خاموشی شرمناک ہے۔
ترک صدر نے کہا کہ غزہ میں اسپتالوں، ایمبولینسوں، اسکولوں پر حملے قابل مذمت ہیں۔ فلسطینی عوام دہائیوں سے اسرائیلی جارحیت کا شکار ہیں۔ اسرائیل 7 اکتوبر کے حملے کا ناقابل قبول انداز میں بدلہ لے رہا ہے۔
انہوں نے یہ بھی کہا کہ مسجد اقصیٰ ہمارے لیے ریڈ لائن ہے، اسرائیلی حکام کے مظالم کا عالمی عدالت میں احتساب ہونا چاہیے۔
