ریسرچ پیپر کی تھیم پر مبنی انوکھا شادی کارڈ

29 نومبر ، 2023

کبھی طویل ہار اور کبھی ہیلی کاپٹر میں بارات کی صورت رشتۂ ازدواج میں منسلک ہونے والے ہر جوڑے کی کوشش ہوتی ہے کہ ان کی شادی ان کے ساتھ ساتھ ہر ایک کے لیے یاد گار بن جائے۔

سوشل میڈیا پر وائرل شادی کے ایک دعوت نامے نے اپنے منفرد تھیم کے سبب ہر ایک کی توجہ حاصل کر لی۔

رشتۂ ازدواج میں منسلک ہونے والے بنگلا دیشی جوڑے نے شادی کے دعوت نامے کے لیے ریسرچ پیپر تھیم کا انتخاب کیا ہے۔

سماجی رابطے کی ویب سائٹ ایکس پر ریان ڈیفینٹلی نامی اکاؤنٹ سے تحقیقی مقالے کی انوکھی تھیم پر مبنی شادی کا دعوت نامہ شیئر کیا گیا ہے۔

سوشل میڈیا پر شیئر کیے گئے دعوت نامے کی تصویر سے معلوم ہوتا ہے کہ یہ کارڈ سنجنا تبسم سنیہا اور مہجب حسین ایمان نامی جوڑے کا ہے۔

اس کارڈ میں شادی کی اہمیت پر ایک خلاصہ بھی شامل کیا گیا ہے اور ساتھ ہی ایک قرآنی آیت حوالے کے ساتھ لکھی گئی ہے۔

ریان ڈیفینٹلی نامی صارف نے اپنی پوسٹ کے کپشن میں لکھا ہے کہ ’ابھی تک یقین نہیں آ رہا کہ یہ شادی کا دعوت نامہ ہے‘۔

حال ہی میں سوشل میڈیا پر شیئر کی گئی مذکورہ پوسٹ اب تک 3.4 ملین سے زائد صارفین کی توجہ حاصل کر چکی ہے جبکہ 69 ہزار سے زائد صارفین نے اسے پسند کیا اور اس پر تبصرہ کرتے ہوئے اپنے خیالات سے بھی آگاہ کیا ہے۔

دلچسپ و عجیب سے مزید