فرمان الہی
نماز کے اوقات
مسلم لیگ (ن) کے صدر اور سابق وزیراعظم شہباز شریف نے لاہور میٹرو بس سروس کو قصور تک لے جانے کا اعلان کردیا۔
این اے 123 لاہور میں شہباز شریف نے انتخابی ریلی نکالی، جو گجومتہ سے شروع ہوکر پرانا کاہنا پر اختتام پذیر ہوئی۔
انہوں نے مختلف مقامات پر خطابات کے دوران کہا کہ عوام نے نواز شریف کو 8 فروری کو دوبارہ منتخب کیا تو ملک کی تقدیر بدل جائے گی۔
ن لیگی صدر نے مزید کہا کہ فیصلہ کرنا ہے شیر پر مہر لگا کر دوبارہ مہنگائی کا خاتمہ کریں گے، شیر کی جیت پاکستان کی جیت ہوگی۔
ان کا کہنا تھا کہ پاکستان کو دوبارہ ترقی و خوشحالی کی راہ پر گامزن کریں گے۔
شہباز شریف نے یہ بھی کہا کہ پنجاب کو بھی برباد کرنے کی کوشش کی گئی۔ میٹرو بس کی کس کس طرح مخالفت کی گئی، کسی نے کہا جنگلہ بس ہے، بے بنیاد الزامات لگائے گئے۔
انہوں نے کہا کہ ادھر میٹرو چل رہی ہے، اس میٹرو کو اب قصور تک لے کرجائیں گے، لوگوں کا جم غفیر ثبوت ہے کہ فتح نوازشریف کی ہو گی۔
ن لیگی صدر نے کہا کہ بچوں کو لیپ ٹاپ تعلیمی وظائف، اسپتالوں میں مفت ادویات دیں گے۔
ریلی کے دوران کئی مقامات پر کارکنوں نے شہباز شریف پر پھولوں کی پتیاں نچھاور کیں اور اُن کے حق میں نعرے بھی لگائے۔
