فرمان الہی
نماز کے اوقات
پاکستان سپر لیگ (پی ایس ایل) 9 کے 21ویں میچ میں پشاور زلمی نے دلچسپ مقابلے کے بعد ملتان سلطانز کو 4 رنز سے ہرادیا۔
پنڈی کرکٹ اسٹیڈیم میں پشاور زلمی کے 205 رنز کے ہدف کے تعاقب میں ملتان سلطانز کی ٹیم 200 رنز بناسکی۔
بڑے ہدف کے تعاقب میں ملتان سلطانز کے کپتان محمد رضوان نے 32 رنز کی اننگز کھیلی۔ ڈیوڈ ملان 19، طیب طاہر 26 اور خوشدل شاہ 11 رنز بنا کر آؤٹ ہوئے۔
چھٹی وکٹ پر افتخار احمد اور کرس جارڈن کے درمیان 28 گیندوں پر 75 رنز کی دھواں دار پارٹنرشپ بنی لیکن دونوں ٹیم کو جیت نہ دلواسکے۔
افتخار احمد نے 27 گیندوں پر 60 جبکہ کرس جارڈن نے 12 گیندوں پر 30 رنز بنائے۔ دونوں کی اننگز میں مجموعی طور پر 7 چھکے اور اتنے ہی چوکے شامل تھے۔
پشاور زلمی کی جانب سے عامر جمال نے 2 کھلاڑیوں کو آؤٹ کیا جبکہ مہران ممتاز اور نوین الحق نے ایک، ایک وکٹ لی۔
اس سے قبل میچ میں پشاور زلمی نے ٹاس جیت کر پہلے بیٹنگ کا فیصلہ کیا۔
پشاور زلمی نے پہلے بیٹنگ کرتے ہوئے مقررہ 20 اوورز میں 5 وکٹوں کے نقصان پر 204 رنز بنائے۔
زلمی کی جانب سے بابر اعظم 64 رنز بنا کر ٹاپ اسکورر رہے جبکہ صائم ایوب نے 46 رنز کی اننگز کھیلی۔
حسیب اللّٰہ خان 31 اور آصف علی 11 رنز بنا کر آؤٹ ہوئے، جبکہ رومین پاول 23 اور عامر جمال 12 رنز بنا کر ناٹ آؤٹ رہے۔
ملتان سلطانز کی جانب سے اسامہ میر نے 3 کھلاڑیوں کو آؤٹ کیا جبکہ کرس جارڈن نے دو وکٹیں لیں۔
پشاور زلمی کی ٹیم کپتان بابر اعظم، صائم ایوب، ٹام کوہلر کیڈمور، حسیب اللہ خان، رومین پاول، آصف علی، عامر جمال، لیوک ووڈ، نوین الحق، مہران ممتاز اور سلمان ارشاد پر مشمل تھی۔
ملتان سلطانز کی ٹیم میں کپتان محمد رضوان، ریزا ہینڈرکس، ڈیوڈ ملان، طیب طاہر، افتخار احمد، خوشدل شاہ، کرس جورڈن، ڈیوڈ ویلے، اسامہ میر، آفتاب ابراہیم اور محمد علی شامل تھے۔
ایونٹ کے پہلے میچ میں بھی پشاور زلمی نے ملتان سلطانز کو شکست دی تھی۔
