گوادر میں شہید دونوں سپاہیوں کی نمازِ جنازہ ادا

گوادر پورٹ اتھارٹی کالونی میں شہید ہونے والے دونوں سپاہیوں کی نمازِ جنازہ ادا کر دی گئی۔

پاک فوج کے شعبۂ تعلقاتِ عامہ (آئی ایس پی آر) کے مطابق شہید سپاہیوں بہار خان اور عمران علی کی نمازِ جنازہ گوادر میں ادا کی گئی ہے۔

شہداء کی نمازِ جنازہ میں پاک فوج، پاک بحریہ، بلوچستان پولیس اور سول سوسائٹی کے نمائندوں نے شرکت کی۔

نمازِ جنازہ کے بعد شہداء کے جسدِ خاکی آبائی علاقوں کو روانہ کر دیے گئے، جہاں شہداء کو مکمل فوجی اعزاز کے ساتھ سپردِ خاک کیا جائے گا۔

گوادر ڈویلپمنٹ اتھارٹی کمپلیکس میں حملہ ناکام، فائرنگ کے تبادلے میں 8 دہشت گرد ہلاک، 2 اہلکار شہید

کوئٹہ سیکورٹی فورسز نے گوادر جی ڈی اے کمپلیکس میں...

35 سالہ سپاہی بہار خان کا تعلق ڈی جی خان سے جبکہ 28 سالہ سپاہی عمران علی کا تعلق خیر پور سے تھا۔

آئی ایس پی آر کا اس ضمن میں کہنا ہے کہ پاکستان کی مسلح افواج قوم کے شانہ بشانہ کھڑی ہیں، مسلح افواج امن و استحکام اور دہشت گردی کی کوششیں ناکام بنانے کے لیے پرعزم ہیں۔

پاک فوج کے شعبۂ تعلقاتِ عامہ کا یہ بھی کہنا ہے کہ یہ قربانیاں دہشت گردی کی لعنت سے لڑنے کے ہمارے عزم کو مضبوط کرتی ہیں، مادرِ وطن سے دہشت گردی کی لعنت کے خاتمے تک جنگ جاری رہے گی۔

واضح رہے کہ گزشتہ روز سیکیورٹی فورسز نے گوادر جی ڈی اے کمپلیکس میں دہشت گردوں کا حملہ ناکام بنا دیا تھا ،فائرنگ کے تبادلے میں کالعدم تنظیم کے 8 دہشت گرد ہلاک جبکہ 2 سیکیورٹی اہلکار شہید اور 2 زخمی ہو گئے تھے۔

کالعدم بلوچ لبریشن آرمی نے حملے کی ذمے داری قبول کی تھی۔