فرمان الہی
نماز کے اوقات
وزیر اعظم محمد شہباز شریف نے کہا ہے کہ پاکستان امریکا کے ساتھ تعلقات کو کلیدی اہمیت دیتا ہے۔ دونوں ملک توانائی، موسمیاتی تبدیلی اور زراعت و دیگر شعبوں میں مل کر کام کر رہے ہیں۔
وزیراعظم نے یہ بات امریکی صدر جو بائیڈن کو اپنے جوابی خط میں کہی۔ وزیراعظم شریف نے مزید کہا کہ دونوں ممالک کے درمیان توانائی اور گرین الائنس اقدام میں تعاون خوش آئند ہے۔
انکا کہنا تھا کہ خطے کی ترقی و خوشحالی کے مشترکہ ہدف کے حصول کےلیے بھی مل کر کام کرنا چاہتے ہیں۔ امریکا کے ساتھ عالمی امن و سلامتی کےلیے مل کر کام کرنے کے خواہاں ہیں۔
واضح رہے کہ دو روز قبل امریکی صدر جو بائیڈن نے وزیراعظم شہباز شریف کو ان کے منصب سنبھالنے کے بعد خط لکھا تھا۔
جس میں انہوں نے نومنتخب حکومت کےلیے نیک تمناؤں کا اظہار کرتے ہوئے کہا کہ دونوں ممالک کے عوام کے درمیان شراکت داری دنیا اور ہمارے عوام کی سلامتی یقینی بنانے میں اہم ہے۔
امریکی صدر نے مزید تحریر کیا تھا کہ دنیا اور خطے کو درپیش وقت کے اہم ترین چیلنجز کا سامنا کرنے میں امریکا پاکستان کے ساتھ کھڑا رہے گا اور صحت عامہ کا تحفظ، معاشی ترقی اور سب کےلیے تعلیم مشترکہ وژن ہے جسے مل کر فروغ دیتے رہیں گے۔
