محکمہ ایکسائز پنجاب کا ٹوکن ٹیکس کی ادائیگی کیلئے 26 بینکوں کو خط

محکمہ ایکسائز پنجاب نے لیز شدہ گاڑیوں کے ٹوکن ٹیکس کی ادائیگی کےلیے پاکستان بھر کے 26 بینکوں کے صدور کو خط لکھ دیا ہے۔

ڈائریکٹر ایکسائز لاہور محمد آصف نے کہا ہے کہ 14 دن میں ٹوکن ٹیکس ادانہ ہونے پر گاڑیوں کی رجسٹریشن منسوخی کے ساتھ بینکوں سے ٹیکس وصول کیا جائے گا۔

تمام بینکوں کے ہیڈز کو لکھے گئے خط میں 18 ہزار سے زائد نادہندہ گاڑیوں کا معاملہ شامل ہے۔

محکمہ ایکسائز نے ٹوکن ٹیکس ادا نہ کرنے پر تادیبی کاروائی کا عندیہ دیتے ہوئے کہا کہ بینک اپنی لیز شدہ گاڑیوں کی ماہانہ اقساط بمعہ سود وصول کرتے ہیں۔

خط میں واضح طور پر کہا گیا کہ نادہندہ گاڑیوں کی رجسٹریشن منسوخ اور 100 فیصد جرمانہ عائد کیا جاسکتا ہے اور بینکوں کی جائیداد کی قرقی کے لیے قانونی کارروائی بھی کی جاسکتی ہے۔