غزہ: دیرالبلح میں اسرائیلی فوج کی بمباری، 120 فلسطینی شہید

غزہ کے علاقے دیرالبلح میں اسرائیلی فوج نے شدید بمباری کرتے ہوئے 120 فلسطینیوں کو شہید کردیا۔ 

عرب میڈیا کا کہنا ہے کہ اسرائیلی فوج کی دیرالبلح کے اسپتال الاقصیٰ کے اطراف گولہ باری جاری ہے۔ اسرائیلی فوج نے دیرالبلح میں نصیرات، المغازی اور البریج کیمپوں کو نشانہ بنایا۔

غزہ میڈیا دفتر کا کہنا ہے کہ اسرائیلی فوج کی بمباری سے 400 سے زیادہ فلسطینی زخمی ہوئے ہیں۔

القسام بریگیڈ کا کہنا ہے کہ وسطی غزہ میں نصیرات کیمپ اور دیگر علاقوں میں اسرائیلی آپریشن میں کچھ یرغمالی بھی مارے گئے۔

اسرائیلی فوج کی دیر البلح میں بےگھر فلسطینیوں پر بمباری، 30 افراد شہید

غیر ملکی میڈیا کی رپورٹ کے مطابق شمالی غزہ میں امدادی ٹرکوں پر حملے کیے گئے۔

دوسری جانب اسرائیلی حملوں پر الاقصیٰ اسپتال کے حکام نے کہا ہے کہ اسرائیلی فوج نے اسپتال کے اطراف پناہ گزین کیمپوں پر شدید بمباری کی ہے۔ 

اسپتال حکام کا کہنا تھا کہ اسرائیلی فوج نے دیرالبلح کے کیمپوں میں بدترین قتل عام کیا۔ اسرائیلی حملوں سے سیکڑوں زخمی افراد کےلیے اسپتال میں جگہ کم پڑگئی۔