قربانی ہوگئی! اب بنائیے کلیجی ہماری ترکیب سے

عید الاضحیٰ پر گوشت سے مختلف اقسام کے روایتی پکوان تیار کیے جاتے ہیں، جو ذائقے دار اور غذائیت سے بھرپور ہوتے ہیں لیکن ہر گھر میں قربانی ہوتے ہی سب سے پہلے مختلف انداز میں کلیجی تیار کی جاتی ہے۔

اس تہوارِ خاص، عیدالاضحیٰ کے لیے حسبِ روایت کلیجی کی کچھ تراکیب پیشِ خدمت ہیں۔

کلیجی قیمہ

اجزاء:

کلیجی(دھو کر چوپ کرلیں اور چھلنی میں رکھ دیں) ڈیڑھ کلو، ادرک لہسن کا پیسٹ 2 چائے کے چمچ، پیاز (باریک لچّھے کاٹ لیں) 2 عدد، ٹماٹر (چوپ کرلیں) 3 عدد، سُرخ مرچ پاؤڈر 2 چائے کے چمچ، نمک حسبِ ذائقہ، لیموں (رس نکال لیں) 1 عدد، انڈے 2 عدد، ہرا دھنیا (پتّے دھو کر کوٹ لیں) 1/4 کپ، ہری مرچ (باریک کترلیں) 4 عدد، تیل حسبِ ضرورت

ترکیب:

ایک باؤل میں کلیجی، سُرخ مرچ پاؤڈر، نمک، ادرک، لہسن کا پیسٹ اور لیموں کا رس ڈال کر اچھی طرح مِکس کریں اور 15منٹ کے لیے فریج میں رکھ دیں۔

اس کے بعد ایک پیالے میں انڈے، ہرا دھنیا اور ہری مرچیں ڈال کر اچھی طرح پھینٹ لیں۔

اب ایک پتیلی میں تیل کڑ کڑاکر پیاز فرائی کریں۔ پھر اس میں کلیجی بمع مسالا ڈال کر اتنا بھونیں کہ پانی خشک ہوجائے۔ 

اس کے بعد ٹماٹر ڈال کر 3 سے 4 منٹ بھون کر اس میں انڈے والا آمیزہ ڈال کر تیزی سے چمچ چلاتے ہوئے اچھی طرح بھونیں۔ 

جب تیل نظر آنے لگے، تو چولھا بند کردیں، مزیدار کلیجی قیمہ تیار ہے اسے گرما گرم نان کے ساتھ پیش کریں۔

کھڑے مسالے والی کلیجی

اجزاء:

کلیجی 1 کلو، پانی حسبِ ضرورت، ہری مرچیں 4 عدد، تیل 1 کپ، پیاز 1 عدد (درمیانے سائز کی)، ٹماٹر 1 عدد، پسی لال مرچ 1 کھانے کا چمچ، پسا دھنیا ½ کھانے کا چمچ، نمک حسبِ ضرورت، ادرک لہسن کا پیسٹ 1 کھانے کا چمچ، ہلدی 1 چائے کا چمچ، لونگ 6 عدد، دار چینی 2 ٹکرے، ثابت کالی مرچ 6 عدد، دہی 1 کپ۔

ترکیب:

گرم تیل میں کھڑے مسالے اور پیاز ڈال کر اچھی طرح بُھون لیں۔

اب ادرک، لہسن کا پیسٹ، دہی اور کلیجی ڈال کر اتنا بھونیں کہ مسالا تیل چھوڑ دے۔

اس کے بعد پانی ڈال کر کلیجی گلنے تک پکائیں دھنیے اور ہری مرچوں سے گارنش کرکے گرما گرم پیش کریں۔

فرائی مسالا کلیجی

اجزاء:

کلیجی(دھوکر صاف کرلیں) 1 کلو، پیاز 2 عدد، ٹماٹر (کاٹ لیں) ½ پاؤ، لال مرچ پاؤڈر 1 کھانے کا چمچ، دھنیا پاؤڈر 1 چائے کا چمچ، نمک حسبِ ذائقہ، ہری مرچ (کُٹی ہوئی) 2 چائے کے چمچ، ہلدی پاؤڈر ½ چائے کا چمچ، ادرک کا پیسٹ 2 چائے کے چمچ، ہرا دھنیا (پتّے صاف کرکے باریک کتر لیں) حسبِ ضرورت، تیل ڈیڑھ کپ۔

ترکیب:

ایک پین میں حسبِ ضرورت تیل گرم کرکے کلیجی اچھی طرح بھون کے الگ رکھ دیں۔ 

پھر دوسری پتیلی میں تیل کڑکڑا کر پیاز فرائی کرلیں اور ہرے دھنیے کے علاوہ تمام اجزاء ڈال کر اچھی طرح بھونیں۔ 

اب اس میں فرائی کلیجی اور 1/4 کپ پانی ڈال کر ڈھکن ڈھک کے ہلکی آنچ پر پکنے کے لیے رکھ دیں۔ 

جب تیل نظر آنے لگے، تو چولھا بند کرکے باؤل میں نکال لیں اور ہرا دھنیا چِھڑک کر کے سلاد ،نان یاروٹی کے ساتھ سَرو کریں۔

کلیجی شاشلک

اجزاء:

کلیجی (دھو کر کیوبز میں کاٹ لیں) 1 کلو پپیتے کا پیسٹ 2 کھانے کے چمچ، سرکہ 1 کھانے کا چمچ، لیموں کا رس 2 کھانے کے چمچ، سُرخ مرچ (کُٹی ہوئی) 2 کھانے کے چمچ، گرم مسالا پاؤڈر 1 چائے کا چمچ، دہی 2 کھانے کے چمچ، نمک حسبِ ذائقہ، سفید زیرہ 1 کھانے کا چمچ (بُھون کر پیس لیں)، سیاہ مرچ پاؤڈر 1 چائے کا چمچ، لہسن (باریک چوپ کر لیں) 6 جوے، بیسن 2 کھانے کے چمچ، کارن فلور 2 کھانے کے چمچ، چائنیز نمک 1 چائے کا چمچ، انڈے 2 عدد، تیل حسبِ ضرورت

ترکیب:

ایک پیالے میں انڈے پھینٹ کر اس میں بیسن، کارن فلور، چائنیز نمک ڈال کر اچھی طرح مِکس کر لیں۔

اس کے بعد ایک باؤل میں کلیجی اور دیگر اجزاء ڈال کرمِکس کریں اور 30 منٹ کے لیے فریج میں رکھ دیں۔ 

بعد ازاں، تیل کڑکڑا کر اس میں کلیجی بمع مسالا ڈال کر بھون لیں۔ جب کلیجی اور مسالے کا پانی خشک ہو جائے، تو چولھا بند کردیں۔ 

اس کے بعد کلیجی کے کیوبز لکڑی کی سیخوں میں پرو کر انڈے والے آمیزے میں ڈبو کر گرم تیل میں ڈیپ فرائی کر کے نکال لیں۔