شادی سے پہلے ظہیر اقبال اور اہل خانہ کی سوناکشی سنہا کے والد شتروگھن سنہا سے ملاقات

بالی ووڈ کی دبنگ گرل سوناکشی سنہا اور اداکار ظہیر اقبال رواں ماہ 23 جون کو شادی کے بندھن میں بندھنے جا رہے ہیں۔

شادی سے قبل ظہیر اقبال اور اِن کے اہل خانہ نے سوناکشی کی والدہ اور والد، معروف سینئر اداکار شتروگھن سنہا سے ملاقات کی ہے۔

اس ملاقات کے چرچوں سے سوشل میڈیا پلیٹ فارمز پر ہلچل مچ گئی ہے۔

یاد رہے کہ گزشتہ دنوں خبر سامنے آئی تھی بلاک بسٹر ثابت ہونے والی نیٹ فلکس سیریز ’ہیرا منڈی‘ کی اداکارہ سوناکشی سنہا کی والدہ اور بھائی اُن کی ظہیر اقبال کے ساتھ شادی سے خوش نہیں ہیں۔

سوناکشی کی والدہ اور بھائی لَو نے اداکارہ کو انسٹاگرام سے اَن فالو بھی کر دیا ہے۔

ایسی صورتحال میں  ظہیر اقبال اور اُن کے اہل و عیال کا خوشگوار موڈ میں سوناکشی سنہا کے والد اور والدہ سے ملاقات کرنا کوئی عام بات نہیں ہے۔

پہلے قیاس آرائیاں کی جا رہی تھیں کہ سوناکشی کا مکمل خاندان اس بین المذاہب شادی سے خوش نہیں ہے جبکہ اب ان خدشات نے دم توڑ دیا ہے۔

شتروگھن سنہا کی جانب سے گزشتہ رات ظہیر اقبال اور اُن کے خاندان سے کی گئی ملاقات سے سامنے آنے والی تصاویر خوب وائرل ہیں جنہیں دیکھ کر اندازہ لگایا جا سکتا ہے کہ کم از کم لیجنڈری اداکار اپنی بیٹی کی شادی سے خوش ہیں اور اداکارہ کو والد کی حمایت حاصل ہے۔

دوسری جانب بھارتی میڈیا ’این ڈی ٹی وی‘ کی جانب سے دعویٰ کیا جا رہا ہے کہ اداکارہ سوناکشی اور ظہیر کی شادی کی تقریبات کا آغاز ہو چکا ہے۔

گزشتہ رات شتروگھن سنہا سے ظہر اقبال اور اِن کے خاندان کا ملنا اسی سلسلے کی ایک کڑی تھی۔

یاد رہے کہ سوناکشی سنہا اور ظہیر اقبال 2022ء میں ریلیز ہونے والی فلم ’ڈبل ایکس ایل‘ میں ایک ساتھ کام کر چکے ہیں۔

بھارتی میڈیا کے مطابق مبینہ طور پر اس جوڑی نے 2020ء میں ڈیٹنگ شروع کی تھی۔