عدالتی فیصلے پر عملدرآمد نہ ہوا تو اسلام آباد کی طرف مارچ کرینگے: بیرسٹر سیف

07 جولائی ، 2024

خیبر پختون خوا کے مشیرِ اطلاعات بیرسٹر محمد علی سیف نے کہا ہے کہ عدالتی فیصلے پر عمل درآمد نہ ہوا تو عنقریب اسلام آباد کی طرف مارچ کریں گے۔

اپنے ایک بیان میں انہوں نے کہا ہے کہ اسلام آباد میں کل پی ٹی آئی کا جلسہ معطل کرنا ظلم و جبر اور غیر آئینی ہے، اسلام آباد جلسے سے متعلق عدالتی فیصلے کا انتظار کریں گے۔

بیرسٹر سیف کا کہنا ہے کہ پی ٹی آئی کی عوامی طاقت نے جعلی فارم 47 کی حکومت اور ایوانوں کو ہلا کر رکھ دیا ہے، پی ٹی آئی کے جلسے کے اعلان نے جعلی حکومت کو گھٹنے ٹیکنے پر مجبور کردیا۔

ان کا مزید کہنا ہے کہ مارچ ہوا تو وزیرِ اعلیٰ کے پی قیادت کریں گے۔

واضح رہے کہ چیف کمشنر اسلام آباد نے پی ٹی آئی کو جلسے کی اجازت نہ دینے سے متعلق نوٹیفکیشن جاری کیا تھا جس میں کہا گیا ہے کہ مقامی افراد کی شکایت اور سکیورٹی اداروں کی رپورٹ پر جلسے کا نوٹیفکیشن معطل کیا گیا۔

قومی خبریں سے مزید