اسلامی ملکوں میں لاوا پک رہا ہے، پوری دنیا فلسطینیوں کیساتھ ہے، حافظ نعیم الرحمٰن

امیر جماعت اسلامی حافظ نعیم الرحمٰن نے کہا ہے کہ اسلامی ملکوں میں لاوا پک رہا ہے، پوری دنیا فلسطینیوں کے ساتھ ہے، حکومت سے مطالبہ کرتے ہیں کہ اپنا کردار ادا کرے۔

راولپنڈی میں دھرنے کے شرکاء سے خطاب کرتے ہوئے حافظ نعیم الرحمٰن نے کہا کہ اسرائیل حماس اور القسام بریگیڈ سے شکست کھا چکا ہے، اسرائیل بدلہ معصوم لوگوں سے لے رہا ہے۔

انہوں نے کہا کہ امریکا اسرائیل کو ہر قسم کی سپورٹ فراہم کرتا ہے، اسرائیل کو مغربی ممالک کی سرپرستی حاصل ہے، اسرائیل کی دہشت گردی کو امریکا کی پشت پناہی حاصل ہے۔

حماس کے سیاسی سربراہ اسماعیل ہنیہ ایران میں اسرائیلی حملے میں شہید

اسماعیل ہنیہ ایرانی صدر کی تقریب حلف برداری میں شرکت کیلئے ایران گئے تھے، تدفین جمعہ کو دوحہ میں کی جائے گی۔

حافظ نعیم الرحمٰن کا کہنا ہے کہ اسماعیل ہنیہ کی شہادت اس تحریک کو مزید آگے بڑھائے گی، ان کی غائبانہ نماز جنازہ بھی ادا کی جائے گی، اگر اسرائیل کا ہاتھ نہ کاٹا گیا تو یہ سب کی گردنوں پر آئے گا۔

امیر جماعت اسلامی نے کہا کہ ہمارے مطالبات اپنی جگہ ہیں، احتجاج بھی جاری ہے، جب تک ہمارے مطالبات پورے نہیں ہوتے ہم یہاں بیٹھے ہیں، یہ کسی پارٹی کا مسئلہ نہیں ہے بلکہ پوری عوام کا مسئلہ ہے۔