اولمپکس میں پاکستان کیلئے میڈل کی امید جی ایم بشیر کل ایکشن میں ہوں گے

پاکستان کے شوٹر غلام مصطفیٰ بشیر کل پیرس اولمپکس میں 25 میٹر ریپڈ فائر پسٹل مقابلوں میں ایکشن میں ہوں گے۔ 2022 کی ورلڈ چیمپئن شپ میں برانز میڈل جیتنے والے جی ایم بشیر اپنے سینے پر اولمپک میڈل سجانے کےلیے پُرعزم ہیں۔

پیرس اولمپکس کےلیے جانے والے 7 ایتھلیٹس میں سے اب پاکستان کے دو ایتھلیٹس ہی باقی ہیں جن میں سے ایک جی ایم بشیر اتوار کو ایکشن میں ہوں گے۔

جی ایم بشیر 25 میٹر ریپڈ فائر پسٹل کے مقابلوں میں اپنی صلاحیت کا مظاہرہ کریں گے۔ پاکستان کے ٹاپ شوٹر 2022 میں مصر میں ہونیوالی رائفل / پسٹل ورلڈ چیمپئن شپ میں برانز میڈل جیتنے والے پہلے پاکستانی بنے تھے۔ ورلڈ چیمپئن شپ میں ان کا اسکور 584 رہا تھا۔ 

جی ایم بشیر پاکستان کے تجربہ کار اولمپئن شوٹر ہیں۔ 2016 میں وہ 571 اسکور کے ساتھ 18ویں اور 2020 میں وہ 579 کے اسکور کے ساتھ 10ویں پوزیشن پر رہے تھے۔ 

پیرس اولمپکس: 5 پاکستانی ایتھلیٹس کا سفر ختم، آخری امید کون؟

پیرس اولمپکس میں شرکت کرنے والی پاکستان کی تینوں خواتین ایتھلیٹس کا سفر ختم ہوگیا۔

پیرس اولمپکس کے شیڈول کے مطابق 25 میٹر ریپڈ پسٹل کے دونوں کوالیفکیشن مرحلے کل ہی ہوں گے۔

پہلا مرحلہ دوپہر 12 بجے اور دوسرا مرحلہ شام 4 بجے شروع ہوگا۔

مقابلے میں شریک 29 شوٹرز کو چار مختلف ری لیز میں تقسیم کیا گیا ہے جس میں شوٹرز دونوں مراحل میں دس، دس شاٹس پر مشتمل تین، تین سیریز میں نشانے لگائیں گے۔

پہلی سیریز میں 8 سیکنڈز، دوسری میں 6 سیکنڈز اور تیسری سیریز میں 4 سیکنڈز میں نشانے مکمل کرنا ہوں گے۔

دو مراحل کے بعد ٹاپ چھ شوٹرز میڈل راؤنڈ کےلیے کوالیفائی کریں گے۔ میڈل راؤنڈ 5 اگست کو کھیلا جائے گا۔