فرمان الہی
نماز کے اوقات
پاکستان سپر لیگ (پی ایس ایل) 10 کے 11ویں میچ میں کراچی کنگز نے دلچسپ مقابلے کے بعد پشاور زلمی کو 2 وکٹوں سے ہرادیا۔
کنگز نے زلمی کی جانب سے دیا گیا 148 رنز کا ہدف آخری اوور میں 8 وکٹوں کے نقصان پر پورا کرلیا، خوشدل شاہ نے اعصاب پر قابو رکھتے ہوئے ناقابلِ شکست 23 رنز بنائے اور اپنی ٹیم کو اہم جیت دلادی۔
ہدف کے تعاقب میں ٹم سیفرٹ پہلی ہی گیند پر ایل بی ڈبلیو آؤٹ ہوگئے جبکہ جیمز ونس بھی جلدی پویلین لوٹ گئے۔ ایسے میں کپتان ڈیوڈ وارنر نے ٹیم کی گرتی وکٹوں کے باوجود اسکور بنانے کا سلسلہ جاری رکھا اور میچ وننگ 60 رنز کی اننگز کھیلی۔
وہ میں اختتامی لمحات میں لوک ووڈ کی گیند پر بولڈ ہوگئے تاہم ایسے میں ان فارم خوشدل شاہ نے میچ کو آخر تک لے جانے کی کوشش کی اور کامیاب رہے۔
کراچی کنگز نے یہ میچ 8 وکٹوں کے نقصان پر 20ویں اوور کی تیسری گیند پر پورا کرلیا۔ حسن علی نے وننگ شاٹ لگا کر اپنی ٹیم کو فتح کی لکیر عبور کروائی۔
کراچی کنگز کے دیگر کھلاڑیوں میں محمد نبی 14، جیمز ونس 11 اور عرفان خان 10 رنز بنا کر نمایاں رہے۔
پشاور زلمی کی جانب سے لوک ووڈ نے 3، علی رضا نے 2 جبکہ الزاری جوزف اور عارف یعقوب نے ایک ایک وکٹ لی۔
کراچی کے نیشنل بینک کرکٹ ایرینا میں کھیلے جانے والے اس میچ میں کراچی کنگز نے ٹاس جیت کر پشاور زلمی کو پہلے بیٹنگ کی دعوت دی۔
پشاور زلمی نے پہلے بیٹنگ کرتے ہوئے مقررہ 20 اوورز میں 8 وکٹوں کے نقصان پر 147 رنز بنائے۔ کپتان بابر اعظم 46 رنز بنا کر ٹاپ اسکورر رہے۔
گزشتہ میچ کی طرح اس میچ کی پہلی اننگز میں بھی پچ سلو اور غیر یقینی باؤنس کے باعث بولرز فرینڈرلی رہی، اور پشاور زلمی کا کوئی کھلاڑی کھل کر بیٹنگ نہ کرسکا جس کا اندازہ اس بات سے لگایا جاسکتا ہے کہ پشاور زلمی کی اننگز کے دوران صرف دو ہی چھکے لگ سکے۔
بابر اعظم کے علاوہ محمد حارث نے 28، الزاری جوزف نے 24، حسین طلعت نے 18 رنز بنائے جبکہ ان کے علاوہ اور کوئی کھلاڑی ڈبل فیگر میں بھی داخل نہ ہوسکا۔
کراچی کنگز کی جانب سے عباس آفریدی اور خوشدل شاہ نے 3، 3 جبکہ عامر جمال اور میر حمزہ نے ایک ایک وکٹ لی۔
واضح رہے کہ اس میچ کےلیے دونوں ٹیموں میں کوئی تبدیلی نہیں کی گئی۔
ٹاس کے موقع پر پشاور زلمی کے کپتان بابر اعظم کا کہنا تھا کہ ٹاس جیت کر بولنگ کرنا چاہ رہے تھے، تاہم ٹاس ہمارے ہاتھ میں نہیں ہے۔
انہوں نے کہا کہ میچ جیتنے پر اعتماد میں اضافہ ہوتا ہے۔ پچ کو دیکھ کر 160 سے 170 اچھا اسکور ہوگا۔
کراچی کنگز کی ٹیم کپتان ڈیوڈ وارنر، ٹم سیفرٹ، جیمز ونس، سعد بیگ، خوشدل شاہ، عرفان خان نیازی، محمد نبی، عامر جمال، عباس آفریدی، حسن علی اور میر حمزہ پر مشتمل تھی۔
پشاور زلمی کی کپتانی بابر اعظم کر رہے ہیں جبکہ دیگر کھلاڑیوں میں صائم ایوب، محمد حارث، ٹام کوہلر کیڈمور، حسین طلعت، مچل اوین، عبدالصمد، لوک ووڈ، الزاری جوزف، عارف یعقوب اور علی رضا شامل تھے۔
