اسرائیلی فوج کا اسکول پر حملہ، متعدد فلسطینی شہید

اسرائیلی فوج نے نصیرات پناہ گزین کیمپ کے شمال میں اسکول پر حملہ کر دیا جس میں متعدد فلسطینی شہید ہو گئے۔

عرب میڈیا کے مطابق شہید و زخمی ہونے والوں میں خواتین اور بچے بھی شامل ہیں، اسکول میں غزہ کے بے گھر فلسطینی پناہ لیے ہوئے تھے۔

دوسری جانب قاہرہ میں غزہ جنگ بندی مذاکرات بغیر کسی معاہدے کے ختم ہوگئے۔

حماس اور اسرائیل نے ثالثوں کے پیش کردہ متعدد سمجھوتوں پر اتفاق نہیں کیا۔

سینئر امریکی اہلکار نے مذاکرات کو تعمیری قرار دیتے ہوئے کہا کہ مسائل کے حل کے لیے مذاکراتی عمل آنے والے دنوں میں ورکنگ گروپس کے ذریعے جاری رہے گا۔

حماس اسرائیل جنگ بندی مذاکرات کسی معاہدے کے بغیر ختم

مصری سیکورٹی ذرائع کا کہنا ہے کہ حماس اور اسرائیل نے ثالثوں کی متعدد تجاویز پر اتفاق نہیں کیا۔

امریکی قومی سلامتی کے مشیر جیک سلیوان نے کہا کہ واشنگٹن قاہرہ میں جنگ بندی اور یرغمالیوں کے معاہدے کے لیے اب بھی کوششیں کر رہا ہے۔

 اپنے بیان میں حماس نے کہا کہ اسرائیل راہداریوں سے فوجیوں کو ہٹانے کے عزم سے پیچھے ہٹ گیا ہے، جنگ بندی شروع ہونے پر بے گھر فلسطینیوں کی اسکریننگ سمیت دیگر نئی شرائط پیش کی گئی ہیں۔

حماس کا کہنا ہے کہ 2 جولائی کو متفق ہوئی شرائط کے علاوہ دیگر شرائط پر بات چیت کو قبول نہیں کریں گے۔