کراچی میں سب سے زیادہ بارش کہاں ہوئی؟

27 اگست ، 2024

محکمہ موسمیات نے کراچی میں رات 11 بجے تک کے بارش کے ریکارڈ جاری کردیے، سب سے زیادہ بارش گلشن حدید میں 42 ملی میٹر ریکارڈ کی گئی۔

محکمہ موسمیات کے مطابق ناظم آباد میں26، سرجانی ٹاؤن میں 25.4 ملی میٹر بارش ریکارڈ ہوئی۔

صدر میں 13 اور پی اے ایف فیصل بیس میں 12 ملی میٹر بارش ریکارڈ کی گئی۔

کراچی میں طاقتور مون سون سسٹم کے زیر اثر بارشوں کا سلسلہ 27 سے 31 اگست تک جاری رہنے کی پیش گوئی کی گئی ہے، جبکہ وزیراعلیٰ ہاؤس میں رین ایمرجنسی سیل قائم کر دیا گیا ہے۔

واضح رہے کہ شہر قائد کے مختلف علاقوں میں آج شام کے بعد گرج چمک کے ساتھ تیز ہوائیں چلیں اور موسلادھار بارش بھی ہوئی ہے۔

میٹرولوجسٹ سرفراز احمد نے وزیراعلیٰ سندھ کو بتایا تھا کہ کراچی میں 150 تا 200 ملی میٹر بارش ہوسکتی ہے، 28 سے 30 اگست کے دوران ہونے والی بارش سے شہر میں اربن فلڈ کی صورتحال پیدا ہوسکتی ہے۔

اس سے قبل وزیراعلیٰ سندھ سید مراد علی شاہ نے موسلا دھار بارشوں کی پیشگوئی کے پیش نظر تمام بلدیاتی اداروں، ضلعی انتظامیہ اور محکمہ آبپاشی کو کسی بھی ہنگامی حالت میں فوری ایکشن کےلیے تیار رہنے کا حکم دیا تھا۔

دوسری جانب حیدرآباد، ٹھٹہ، مٹیاری، بدین، تھرپارکر، سانگھڑ، نواب شاہ، میرپور خاص سمیت سندھ کے مختلف شہروں میں بھی ہلکی اور تیز بارش ہوئی۔

ہالہ، نیو سعیدآباد، بھٹ شاہ میں تیز ہوا کے ساتھ موسلادھار بارش کے بعد نشیبی علاقے زیر آب آگئے، بارش کا پانی گھروں دکانوں میں داخل ہوگیا، بارش اور آندھی سے درخت اور بجلی کے پول بھی گرگئے۔

قومی خبریں سے مزید