پارلیمنٹ کے اندر گرفتاریاں، سارجنٹ ایٹ آرمز اشفاق اشرف معطل

پارلیمنٹ کے اندر گرفتاریوں کے معاملے پر اسمبلی کی سیکیورٹی میں غیر ذمے داری پر سارجنٹ ایٹ آرمز اشفاق اشرف کو معطل کر دیا گیا۔

اسپیکر قومی اسمبلی ایاز صادق نے سارجنٹ ایٹ آرمز کو 4 ماہ کے لیے معطل کیا ہے۔

پارلیمنٹ میں سیکیورٹی میں ناکامی پر دیگر 4 سیکیورٹی اہلکاروں کو بھی معطل کیا گیا ہے۔

واضح رہے کہ گزشتہ روز قومی اسمبلی کے اجلاس کے دوران گفتگو کرتے ہوئے اسپیکر ایاز صادق نے کہا تھا کہ پارلیمنٹ کے اندر سے گرفتاریوں کے واقعے کے ذمے داروں پر مقدمہ درج کراؤں گا، ان کے خلاف ایکشن لیں گے۔

ایاز صادق نے کہا تھا کہ پارلیمنٹ میں جو کچھ ہوا اس پر اسٹینڈ لینا پڑے گا، میں نے تمام ویڈیوز منگوائی ہیں۔

اسپیکر قومی اسمبلی نے کہا تھا کہ دونوں طرف سے ہم بیٹھیں گے، اس معاملے کو سنجیدگی سے دیکھنا ہے، پارلیمنٹ پر پہلا حملہ 2014ء میں ہوا تھا، دوسرا حملہ صلاح الدین ایوبی کی گرفتاری کے موقع پر ہوا۔

اسپیکر قومی اسمبلی کا کہنا تھا کہ اس پر میٹنگ کرتے ہیں، علی محمد خان آپ میرے پاس تشریف لائیں اور ممبران بھی آئیں، ہم اس پر سیریس ایکشن لیں گے۔

جس کے بعد ایاز صادق نے تمام سیاسی جماعتوں کے قیادت کو اسپیکر چیمبر میں طلب کیا تھا اور گرفتار پی ٹی آئی ارکان کے پروڈکشن آڑدر جاری کر دیے تھے۔

اس موقع پر اسپیکر ایاز صادق نے آئی جی اسلام آباد کو طلب کر کے گرفتاریوں پر شدید برہمی کا اظہار کیا تھا۔

انہوں نے آئی جی کو حکم دیا تھا کہ نہ آپ پارلیمنٹ ہاؤس سے کسی کو گرفتار کر سکتے ہیں، نہ پارلیمنٹ لاجز سے، گرفتار پارلمینٹیرینز کو فوراً رہا کیا جائے۔