فرمان الہی
نماز کے اوقات
بانی پی ٹی آئی عمران خان کے انٹرنیشنل ایڈوائزر ذلفی بخاری نے کہا ہے کہ عمران خان کی آکسفورڈ چانسلرشپ کمپین کیلئے لابنگ فرمز کی خدمات حاصل کرلیں، عمران خان کے آکسفورڈ چانسلر کا الیکشن لڑنے میں کوئی رکاوٹ نہیں۔
جیو نیوز کو خصوصی انٹرویو دیتے ہوئے ذلفی بخاری کا کہنا تھا کہ عمران خان کی میڈیا اور آکسفورڈ کی چانسلر شپ کی کمپین کرنے کیلئے دو تین لابنگ فرمز کی خدمات حاصل کی ہیں۔
انہوں نے کہا کہ کسی کو لابنگ فرم کی خدمات کے حصول پر تکلیف نہیں ہونی چاہیے، میں نے اس کیلئے کسی سے پیسے نہیں لیے ہیں۔
ذلفی بخاری کا کہنا تھا کہ یورپ میں کمپین شروع ہوگی تو یورپین ماہرین کی خدمات حاصل کریں گے۔ ہمارے وکلا کی رائے کے مطابق عمران خان کو چانسلر کا الیکشن لڑنے میں کوئی رکاوٹ درپیش نہیں۔
انہوں نے کہا کہ میٹرکس چیمبر کی رائے حتمی نہیں، مختلف وکلا کی رائے الگ الگ ہوتی ہے۔ چانسلرشپ کے الیکشن کی وجہ سے یہاں لوگوں کو پتہ چل رہا ہے کہ عمران خان جیل میں ہیں اور کیوں ہیں۔
انکا کہنا تھا کہ امید ہے کہ آکسفورڈ یونیورسٹی بانی پی ٹی آئی کو الیکشن لڑنے کی اجازت دے گی۔ بانی پی آئی کی مخالفت میں صرف ایک مضمون آیا ہے باقی اکثریت ان کے حق میں ہیں۔
ذلفی بخاری نے کہا کہ بعض جماعتوں کی بقا کیلئے بانی پی ٹی آئی کا جیل میں ہونا ضروری ہے۔ بانی پی ٹی آئی کی رہائی کیلئے رواں ماہ کے اختتام سے ایک نئی کمپین شروع کریں گے۔ آکسفورڈ کا نتیجہ ہمارے حق میں نہ بھی آیا تو نئی مہم شروع کردیں گے۔
