فرمان الہی
نماز کے اوقات
پاکستان کے معروف اداکار، کامیڈین اور میزبان سہیل احمد کا کہنا ہے کہ میں جب بھی دلجیت دوسانجھ کے سامنے استاد نصرت فتح علی خان کے بارے میں بات کرتا تو وہ اپنی آنکھیں نیچی کر لیتے اور کہتے کہ میں نے ان جیسا فنکار کبھی نہیں دیکھا۔
پاکستانی فنکار نے حال ہی میں میڈیا سے بات چیت کی، جہاں انہوں نے دلجیت دوسانجھ سے ہونے والی ملاقات کا احوال بیان کیا۔
انہوں نے بتایا کہ دلجیت دوسانجھ دنیا بھر میں کنسرٹ کر کے انگریزوں سے بھنگڑا کروا سکتے ہیں، ان کے سامنے میں نے جب بھی نصرت فتح علی خان کا نام لیا تو باخدا ان کی آنکھیں جھک جاتی تھیں۔
پاکستانی کامیڈین نے بتایا کہ دلجیت دوسانجھ نصرت فتح علی خان کی بہت عزت کرتے ہیں، ان کا کہنا ہے کہ میں نے دنیا بھر کا میوزک سنا ہے، لیکن نصرت فتح جیسا میوزک کہیں نہیں سنا، وہ مجھے اس دنیا کے نہیں لگتے۔
سہیل احمد کے مطابق دلجیت کا کہنا ہے کہ میرا علم اتنا نہیں ہے کہ میں نصرت فتح علی خان کو جان سکوں۔
پاکستانی فنکار نے یہ بھی کہا کہ بھارتی ہماری موسیقی و شاعر کو بہت پسند کرتے ہیں، خاص طور سے وہ موسیقی اور شاعری جو ماضی میں ہوا کرتی تھی، انہیں ہمارے اداکار و گلوکار بہت پسند ہیں، ماضی میں ایسی کئی مثالیں ملتی ہیں جہاں بھارتی فلمیں پاکستانی فنکاروں کے بغیر مکمل نہیں ہوا کرتی تھیں۔
سہیل احمد نے یہ بھی کہا کہ جس طرح بھارتی فنکار ہمارے فنکاروں کی قدر کرتے ہیں اسی طرح ہمیں بھی اپنے فنکاروں کی قدر کرنی چاہیے۔
