فرمان الہی
نماز کے اوقات
قدرت نے انسان کی جِلد کو نرم و نازک اور بہت حساس بنایا ہے۔ خوبصورت نظر آنے کے لیے صرف خدوخال ہی نہیں بلکہ جِلد کی مناسب دیکھ بھال بھی ضروری ہوتی ہے۔ جِلد کی خوبصورتی کے لیے کریم اور لوشن سے زیادہ اہم مناسب غذا کا حصول ہے۔
اپنی من پسند غذا سے لطف اندوز ہونا ہر شخص کی خواہش ہوتی ہے، تاہم جرمنی کے HELIOS کلینک کے امراض جِلد اور الرجی کے شعبے میں کام کرنے والی کرسٹیاکا کہنا ہے کہ،’جو لوگ متوازن غذا کا استعمال نہیں کرتے، وہ جِلد سے متعلق مسائل سے دوچار رہتے ہیں‘۔
جِلد انسانی جسم کا سب سے بڑا عضو ہے۔ ہر لمحہ ہماری جِلد کا واسطہ نقصان دہ اشیا سے پڑتا رہتا ہے، جو جسم میں ایسے غیر مستحکم ایٹمی ذرّات اور نقصان دہ مادے کی ترسیل کو ممکن بنا دیتے ہیں، جو جِلد کے علاوہ پورے جسم کو بھی غیر معمولی نقصان پہنچانے کا سبب بن سکتے ہیں۔ وٹامنز آپ کی جِلد کو خوبصورت اور صحت مند بنانے میں اہم کردار ادا کرتے ہیں۔ آئیے جانتے ہیں کہ مختلف وٹامنز ہماری جِلد پر کیا اثرات مرتب کرتے ہیں۔
وٹامن اے
غذائیات کی ایک جرمن ماہر گابریئیلے گراف بھی صاف اور نکھری ہوئی جِلد کے لیے وٹامن اور معدنیات کی اہمیت پر غیر معمولی زور دیتی ہیں۔ وہ کہتی ہیں،’وٹامن اے جِلد کی تازگی کے لیے بہت ضروری ہے‘۔ وٹامن اے جِلد کی خشکی اور تھکاوٹ کو دور کرتا ہے۔
اس کی کمی سے جِلد خشک ہوجاتی ہے اور خشکی سے جِلد میں پپڑیاں جمنے لگتی ہیں۔ وٹامن اے بڑھتی عمر کی وجہ سے پیدا ہونے والے جِلدی مسائل کی روک تھام کرتا ہے۔ اس کے علاوہ یہ جِلد کو کیل مہاسوں ، چھائیوں اور جھریوں سے بھی محفوظ رکھتا ہے۔
وٹامن اے سب سے زیادہ دودھ، گاجروں اور مچھلی میں پایا جاتا ہے۔ تربوز میں بھی وٹامن اے پایا جاتا ہے۔ اس میں موجود وٹامن اے جِلد کے کھلے مسام کو بند کرنے اور چربی پیدا کرنے والے گلینڈز کی رفتار کم کردیتا ہے جبکہ اس کو جِلد پر رگڑنے سے یہ کلینزر کا کام دیتا ہے۔
وٹامن بی
وٹامن بی آپ کی رنگت کو خوبصورت بناتا ہے۔ وٹامن بی کمپلیکس جِلد کو ضروری تیل فراہم کرتاہے۔یہ جِلد کو ہمیشہ جوان رکھتا ہے۔ وٹامن بی کی کمی جِلد پر دھبوں ، خشکی، جُھریوں اور ہونٹ پھٹنے کا سبب بنتی ہے۔
وٹامن سی
وٹامن سی جِلد میں جراثیم کے خلاف قوت مدافعت پیدا کرتا ہے۔یہ کولیجن فائبر بنا نے میں مدد گار ثابت ہوتا ہے اور جِلد کو سورج کی الٹراوائلٹ شعاعوں کے مضر اثرات سے محفوظ رکھتا ہے۔ وٹامن سی جِلد میں متعدد جراثیم کے خلاف قوت مدافعت پیدا کرتا ہے۔
جِلد کی صحت کے لیے وٹامن سی کے حصو ل کا سب سے بڑا ذریعہ اسٹرابیری ہے۔ اس میں موجود وٹامن سی جسم میں کولیجن کی سطح بڑھانے کے لیے بھی اہمیت رکھتا ہے، جو جِلد کی لچک اور نرمی کو بہتر بنانے میں مدد دیتا ہے۔
عمر بڑھنے کے ساتھ کولیجن کی سطح میں کمی آتی ہے تاہم وٹامن سی سے بھرپور غذا کے استعمال سے جِلد کو صحت مند اور جوان بنانے میں مدد ملتی ہے۔ وٹامن سی کے ساتھ ساتھ اسٹرابیری میں موجود ellagic acid بھی کولیجن کے خاتمے اور ورم کے ردعمل کو روکتا ہے، یہ دونوں عوامل جُھریوں کا باعث بنتے ہیں۔
اس لیے ہمیشہ جواں نظر آنے اور اپنی جِلد کو جُھریوں سے محفوظ رکھنے کے لیے اسٹرابیریز خوب کھائیں۔ اس کے علاوہ، کینو بھی غذائیت سے بھرپور پھل ہے، جو وٹامن سی کے حصول کا ایک بہترین اور آسان ذریعہ ہے۔
وٹامن ڈی
اس وٹامن کی خوبی یہ ہے کہ اسے پیسوں کے بغیر بھی حاصل کیا جاسکتاہے۔ بس کچھ دیر دھوپ میں بیٹھ کر بہت سارا وٹامن ڈی حاصل کر کے صحت کی بہتر نشوونما کو ممکن بنایا جاسکتا ہے۔ سورج کی روشنی کے بعد وٹامن ڈی سب سے زیادہ دودھ میں پایا جاتا ہے، یہی وجہ ہے کہ روزانہ ایک گلاس دودھ پینے والے افراد کی ہڈیاں، عضلات اور دانت مضبوط جبکہ جِلد روشن اور چمکدار رہتی ہے۔ وٹامن ڈی جِلد کے لیے ضروری وٹامنز میں سرفہرست ہے۔ اس کی کمی جِلد کی خرابی کاسبب بنتی ہے۔
وٹامن ای
وٹامن ای زخم، سوزش اور جِلد کی سرخی اور جلن کو کم کرنے میں مددگار ثابت ہوتا ہے۔ یہ حل پذیر ہونے والا وٹامن ایک طاقتور اینٹی آکسیڈنٹ ہے۔ یہ جِلد میں پیدا ہونے والے فری ریڈیکلز کے خلاف مضبوط قوت مدافعت پیدا کرتا ہے۔ جِلد کی خوبصورتی کے لیے تیار کردہ مصنوعات میں وٹامن ای لازمی عنصر کی حیثیت رکھتا ہے۔ ایسی کریمز، جن میں وٹامن ای شامل ہو،جِلد پر لگانا مفید ثابت ہوتا ہے۔
صحت مندرہنے کے لیے مَردوں کو روزانہ وٹامن ای کے 15یونٹس اور خواتین کو 12یونٹس لینا ضروری ہیں۔ وٹامن ای کی وافر مقدار گندم، کیلے، سورج مکھی کے بیج،گری دارمیوے، نباتاتی تیل، پالک وغیرہ میں موجود ہوتی ہے۔چہرے کے ترو تازہ اور جوان نظر آنے کا ایک راز اور بھی ہے۔
وہ یہ کہ زیادہ سے زیادہ پانی پینا اور جسم کو ہائیڈریٹڈ یا آبیدہ رکھنا۔ خوب پانی پینے سے چہرہ تروتازہ رہتا ہے۔ زیادہ تر ماہرین کا کہنا ہے کہ، صحت مند جِلد کے لیے وٹامن، منرلز ، پروٹین اور امینوایسڈ کا استعمال بہت ضروری ہے۔
