فرمان الہی
نماز کے اوقات
انٹرنیشنل کرکٹ کونسل (آئی سی سی) چیمپئنز ٹرافی سے قبل جنوبی افریقا کی ٹیم کی مشکلات میں مزید اضافہ ہو گیا۔
فاسٹ بولر اینرک نورکیا کے بعد فاسٹ بولر جیرالڈ کوئیٹزی انجری کے باعث پاکستان میں ہونے والی سہ فریقی سیریز اور چیمپئنز ٹرافی سے باہر ہو گئے۔
نورکیا کی انجری کے بعد جیرالڈ کوئیٹزی کا نام ان کے متبادل کے طور پر چیمپئنز ٹرافی اور سہ افریقی سیریز کے اسکواڈ میں شامل کیا گیا تھا، اب وہ بھی انجری کا شکار ہو کر اسکواڈ سے باہر ہو گئے ہیں۔
کرکٹ جنوبی افریقا کے مطابق کوئیٹزی نے بدھ کو ٹریننگ کے دوران بولنگ کرتے ہوئے اپنی ران میں کھنچاؤ محسوس کیا تھا، جس کے بعد فاسٹ بولر کا میڈیکل ٹیم نے معائنہ کیا جس میں ان کی انجری کو شدید قرار دیا گیا، جس کی وجہ سے وہ چیمپئنز ٹرافی کے لیے ٹیم کو دستیاب نہیں ہوں گے۔
رپورٹ کے مطابق نوجوان فاسٹ بولنگ آل راؤنڈر کوربن بوش اور لوتھو سپاملا چیمپئنز ٹرافی میں کوئیٹزی کے متبادل کے مضبوط امیدوار ہیں۔
پاکستان کی میزبانی میں ہونے والے اس شاندار ٹورنامنٹ کا آغاز 19 فروری کو کراچی کے نیشنل اسٹیڈیم میں ہوگا، جہاں پاکستان اور نیوزی لینڈ کے درمیان افتتاحی میچ کھیلا جائے گا۔
اس ٹورنامنٹ میں پاکستان، بھارت، آسٹریلیا، انگلینڈ، جنوبی افریقہ، بنگلادیش، افغانستان اور نیوزی لینڈ کی ٹیمیں شرکت کریں گی۔
جنوبی افریقا کی ٹیم اپنا پہلا میچ 21 فروری کو افغانستان کے خلاف کراچی میں کھیلے گی۔
پاکستان کا پہلا نجی اسپورٹس چینل ”جیو سوپر“ شائقین کرکٹ کیلئے تمام سنسنی خیز مقابلے براہ راست نشر کرے گا۔
