فرمان الہی
نماز کے اوقات
غزہ جنگ بندی معاہدے کے تحت قیدیوں کے تبادلے کے بعد اسرائیلی جیلوں سے رہا 111 فلسطینی غزہ پٹی پہنچ گئے، اس سے قبل حماس نے 3 اسرائیلی یرغمالیوں کو رہا کیا تھا۔
اسرائیلی جیل سے رہائی پانیوالے ایک قیدی یاسر ابو اعظم کا کہنا تھا کہ ہمیں دو دن پہلے رہائی کی اطلاع ملی اور تب سے میں ایک لمحہ بھی نہیں سو سکا، ہر وقت یہی سوچتا رہا کہ میرے اہلِ خانہ زندہ ہیں یا نہیں۔
رہائی پانے والے فلسطینی قیدی نے خان یونس میں عرب ٹی وی سے بات کرتے ہوئے کہا کہ میں نے اپنے بیٹے محمد کو 14 ماہ سے نہیں دیکھا۔ وہ ابھی تک جیل میں ہے، مجھے امید ہے کہ وہ خیریت سے ہوگا۔
انہوں نے دورانِ قید اپنے ساتھ ہونے والے سخت سلوک کو بیان کرتے ہوئے بتایا کہ قید میں ہمیں کھانے کو کچھ نہیں ملتا تھا، ہم بھوک سے نڈھال تھے، اور ہمیں ہر وقت مارا پیٹا جاتا تھا۔
اپنی جسمانی حالت کے بارے میں بتاتے ہوئے یاسر نے کہا کہ جب میں گرفتار ہوا تو میرا وزن 120 کلوگرام تھا اور اب صرف 80 کلو رہ گیا ہے۔
خیال رہے کہ غزہ معاہدے کے تحت قیدیوں کے تبادلے کے پانچویں مرحلے میں حماس نے تین یرغمالی، اسرائیل نے 183 فلسطینی قیدی رہا کیے ہیں۔
