فرمان الہی
نماز کے اوقات
پاسدارانِ انقلاب کے چیف کمانڈر کے مشیر بریگیڈیئر جنرل ابراہیم جباری نے اسرائیل کو صفحۂ ہستی سے مٹانے کی دھمکی دے دی۔
ایرانی میڈیا کی رپورٹ کے مطابق بریگیڈیئر جنرل ابراہیم جباری نے نیم فوجی دستوں کی جاری مشقوں کے دوران گفتگو کرتے ہوئے کہا ہے کہ ایران صحیح وقت آنے پر ایک بڑے حملے میں اسرائیل کا صفایا کر دے گا۔
ان کا کہنا ہے کہ ایران کا تیسرا میزائل حملہ تل ابیب اور حیفہ کو تباہ اور اسرائیل کو صفحۂ ہستی سے مٹا دے گا۔
ایرانی بریگیڈیئر جنرل نے کہا کہ آپریشن ٹرو پرومِس 3 صحیح وقت آنے پر، درست حکمتِ عملی اپناتے ہوئے بڑے پیمانے پر کیا جائے گا جس سے ناصرف اسرائیل کا صفایا ہو گا بلکہ تل ابیب اور حیفہ بھی زمین بوس ہو جائیں گے۔
ابراہیم جباری نے دعویٰ کیا ہے کہ امریکا یمن کے خلاف کچھ نہیں کر سکتا، لبنان، عراق اور فلسطین میں مزاحمتی محاذ تیاری کے عروج پر ہیں اور سپریم لیڈر علی خامنہ ای نے بھی میزائلوں کی رینج بڑھانے کا حکم دیا ہے۔
یاد رہے کہ ایران نے گزشتہ برس محدود پیمانے پر اسرائیل پر 2 بار بیلسٹک و کروز میزائل اور ڈرون حملے کیے تھے، دونوں حملے آپریشن ٹرو پرومس کا حصہ تھے۔
