فرمان الہی
نماز کے اوقات
متحدہ عرب امارات کی ریاست دبئی میں رہائشیوں کیلئے خوشخبری ہے کہ ویزا کی تجدید ( renewal) سے قطعی پریشان نہ ہوں۔ ویزے کی تجدید گھر بیٹھے، چند منٹوں میں اور اپنے فون سے چند کلکس میں کرائیں۔
دبئی ویزا کی تجدید کو آسان اور تیز تر بنانے کےلیے ایک نیا نظام متعارف کرایا گیا ہے۔ جنرل ڈائریکٹوریٹ آف ریذیڈنسی اینڈ فارنرز افیئرز (جی ڈی آر ایف اے) نے ’’سلامہ‘‘ کے نام سے ایک آن لائن پلیٹ فارم لانچ کیا ہے، جو آرٹیفیشل انٹیلجنس (مصنوعی ذہانت) کے ذریعے کام کرتا ہے۔
یہ اعلان جی ڈی آر ایف اے کے ہیڈ کوارٹر الجفیلیہ میں منعقدہ چوتھے سالانہ میڈیا کونسل کے دوران کیا گیا۔ دبئی امیگریشن کے سربراہ لیفٹیننٹ جنرل محمد احمد المری نے اسے دبئی کی ڈیجیٹل تبدیلی کی جانب ایک اہم قدم قرار دیا جو رہائشیوں کی زندگی کو بہتر بنانے کیلئے لانچ کیا گیا ہے۔
’’سلامہ‘‘ کے ذریعے رہائشی اور ان کے اہل خانہ کے ویزے منٹوں میں تجدید کر سکتے ہیں۔ صارفین لاگ اِن کرکے تجدید کی مدت منتخب کریں، فیس ادا کریں اور اپڈیٹ شدہ دستاویزات ڈاؤن لوڈ کریں۔ اس عمل میں کاغذی کارروائی اور کسی لمبی قطار کی ضرورت نہیں اور نہ ہی کسی صارف کو ٹائپنگ سینٹر کا رُخ کرنا پڑے گا۔
یہ پلیٹ فارم صارفین کو ویزا کی مدت ختم ہونے کی تاریخ سے پہلے نوٹیفکیشن بھیجے گا اور اہل خانہ کے ویزوں کی مدت ختم ہونے سے پہلے آگاہ کرے گا۔
دبئی امیگریشن کے اسسٹنٹ ڈائریکٹر جنرل برائے ڈیجیٹل سروسز کرنل خالد الفلاسی نے کہا کہ ’’سلامہ‘‘ جدید ٹیکنالوجی کے ذریعے فوری اور درست جوابات فراہم کرتا ہے، جس سے حکومتی سروس کو مزید بہتر کرنے میں مدد ملے گی۔
