فرمان الہی
نماز کے اوقات
بھارتی اسپورٹس جرنلسٹ وکرانت گپتا پاکستانی بیٹسمین بابر اعظم کی حمایت میں سامنے آ گئے۔
وکرانت گپتا نے حال ہی میں ’جیو‘ کے خصوصی پروگرام ’ہارنا منع ہے‘ میں بطور مہمان شرکت کی جہاں ان سے یہ سوال پوچھا گیا کہ اگر بابر اعظم کا تعلق بھارت سے ہوتا تو ان پر وہاں بھی اسی طرح تنقید کی جاتی جیسے یہاں پر ہو رہی ہے؟
اُنہوں نے اس سوال کا جواب دیتے ہوئے کہا کہ بھارتی کھلاڑی ویرات کوہلی، روہت شرما اور دھونی سب پر ایسا وقت آیا جب ان کی پرفارمنس خراب ہوئی لیکن لوگوں نے اُنہیں گالیاں نہیں دیں بلکہ صرف ان کی خراب پرفارمنس پر تنقید کی گئی۔
بھارتی صحافی نے کہا کہ میں پاکستانی میڈیا کی بات نہیں کروں گا کیونکہ یہاں بہت اچھی گفتگو ہوتی ہے لیکن ڈیجیٹل میڈیا پر ناجائز تنقید ہوتی ہے۔
اُنہوں نے کہا کہ بابر اعظم کوئی چور یا ڈاکو تھوڑی ہیں کہ لوگ اُنہیں گالیاں دینا شروع ہو گئے۔
وکرانت گپتا نے کہا کہ بابر اعظم کی غلطی یہ ہے کہ اُنہوں نے کپتانی کا لالچ کیا، جب ایک بار ٹیم کی کپتانی ان کے ہاتھ سے گئی تو اُنہیں کپتانی واپس نہیں لینی چاہیے تھی۔
اُنہوں نے کہا کہ مجھے لگتا ہے کہ بابر اعظم تنقید کو برداشت نہیں کر پا رہے اور ذہنی دباؤ میں ہیں۔
بھارتی صحافی نے کہا کہ ویرات کوہلی پر بھی برا وقت آیا لیکن وہ اس وقت سے جلدی باہر نکل گئے۔
