فرمان الہی
نماز کے اوقات
قدسیہ فیصل
ماہِ رمضان میں دن بَھر بُھوکا، پیاسا رہنے کے بعد ہر فرد ہی کی کوشش ہوتی ہے کہ افطار دسترخوان قدرت کی عطا کردہ مختلف نعمتوں سے سجا ہوا ہو، جنہیں کھا کر وہ اللہ تعالیٰ کا شُکر بجا لائے۔ یہی وجہ ہے کہ خواتینِ خانہ ہر دوسرے روز افطار دسترخوان میں کچھ نئی ڈِشز کے اضافےکی سعی کرتی نظر آتی ہیں کہ ایک جیسے پکوان کھا کھا کربھی دِل اُکتا جاتا ہے۔
البتہ اکثر خواتین اِس حوالے سے پریشان ہی رہتی ہیں کہ آج کون سی نئی ڈِش ٹرائی کی جائے، توخواتینِ خانہ کی اِسی الجھن کو مدِنظر رکھتے ہوئے ہم اِس ہفتے آپ کے لیے کچھ مختلف سی افطار ڈِشز کی تراکیب کے ساتھ حاضر ہیں۔ آپ اِنہیں ضرور آزمائیں۔ ہمیں اُمید ہےکہ یہ تراکیب نہ صرف پسند آئیں گی، بلکہ فرمائش کر کے بار بار بنوائی بھی جائیں گی۔
لاہوری چنا چاٹ
اجزاء:
کابلی چنے آدھا کلو (اُبلے ہوئے)، آلو تین عدد (اُبلےاور کیوبز کی شکل میں کٹے ہوئے)، ہری مرچیں چار عدد (باریک کٹی ہوئی)، پیاز دو عدد (باریک کٹی ہوئی)، لیموں کا رس دو کھانے کے چمچ، چینی ایک کھانے کا چمچ، زیرہ ایک کھانے کا چمچ (بُھنا اور کٹا ہوا)، لال مرچ ایک چائے کا چمچ (پسی ہوئی)، لال مرچ ایک چائے کا چمچ (کٹی ہوئی)، چاٹ مسالا ایک چائے کا چمچ، نمک ایک چائے کا چمچ، ٹماٹر ایک عدد (باریک کٹا ہوا)، ہرا دھنیا دو کھانے کے چمچ، املی آدھا کپ، پاپڑی تین سے چار عدد۔
ترکیب:
ایک پیالے میں کابلی چنے، آلو، ہری مرچ، پیاز، لیموں کا رس، چینی، زیرہ، پسی لال مرچ، کٹی لال مرچ، چاٹ مسالا، نمک، ٹماٹر اور ہرا دھنیا ڈال کر مکس کرلیں۔ اب اس پر ہرا دھنیا، املی کی چٹنی اور پاپڑی ڈال کر پیش کریں۔ ذائقے دار چنا چاٹ تیار ہے۔
گجراتی دہی بڑے
اجزاء:
ماش کی دال ڈیڑھ کپ، نمک حسبِ ذائقہ، تیل تلنے کے لیے، دہی ایک کلو، املی کی میٹھی چٹنی حسبِ ضرورت، ناریل پسا ہو ا آدھا چائے کاچمچ، ہرا دھنیا آدھی گڈی باریک کٹا ہوا، نمک ایک چائے کا چمچ، لال مرچ ایک چائے کا چمچ، چاٹ مسالا ایک کھانے کا چمچ، بگھار کے لیے تیل دو کھانے کے چمچ، رائی ایک کھانے کا چمچ، کڑی پتا دو ڈنڈی۔
ترکیب:
ماش کی دال دو سے تین گھنٹے کے لیے بھگو دیں، پھراس کا پانی نکال کر پیس لیں( دال بالکل باریک نہ ہو، دانے دار رہنی چاہیے)، اس میں نمک ملالیں۔ اب کڑاہی میں تیل گرم کریں اور بڑے بڑے پکوڑے بالکل ہلکے ہاتھ سے ڈال کر فرائی کرلیں۔ گولڈن ہوجائیں تو نکال کر ایک کُھلے برتن میں پانی میں ڈالتی جائیں۔ اس کے بعد دہی میں صرف چینی ڈال کر پھینٹ لیں۔
اب ایک ڈش لیں اور پکوڑوں کو دونوں ہاتھ سے ہلکا ہلکا دبا کر پانی نچوڑ لیں، ڈش میں یہ پکوڑے رکھیں، اوپر دہی ڈالیں، پھر اس پراملی کی چٹنی، ناریل، نمک، لال مرچ، چاٹ مسالا، رائی ،کڑی پتے کا بگھار اور ہرا دھنیا ڈال دیں۔
کشمیری پکوڑے
اجزاء:
پیاز ایک عدد، آلو ایک عدد، نمک حسب ِذائقہ، پسی ہوئی لال مرچ حسبِ ذائقہ، پسا ہوا دھنیا ایک چھوٹا چمچ، پسا ہوا زیرہ ایک چھوٹا چمچ، انار دانہ حسبِ ذائقہ، ہری مرچ ایک یا دو عدد، لیموں آدھا، دہی دوسے تین بڑے چمچ، ہلدی ایک چوتھائی چمچ۔
ترکیب :
سب سے پہلے ہری مرچ اور پیاز باریک کاٹ لیں اور آلو کدوکش سےموٹا موٹا کش کرلیں۔ پھر کٹی ہوئی ہری مرچ، پیاز اور سارے مسالے ڈال کریک جان کرلیں۔ اگلے مرحلے میں آدھا لیموں نچوڑ کرمکس کریں اور اب اس میں تھوڑا سا بیسن شامل کردیں،پھر دہی ڈال کر مکس کریں۔
بالکل اُسی طرح جیسے پکوڑوں کے لیے آمیزہ بناتے ہیں، مگر پانی نہ ڈالیں کہ یہ آمیزہ دہی ڈال کر بنتا ہے اور سخت رکھا جاتا ہے۔ یعنی پیسٹ نرم نہ ہو۔ اس کے بعد تھوڑی دیر رکھا رہنے دیں۔ پیاز پانی چھوڑ دے گی اور پیسٹ نرم ہو جائے گا۔ اب پکوڑے بنا کر تل لیں اور سنہرا ہونے پر نکال کر گرما گرم کھانے کے لیے پیش کردیں۔
فروٹ کاک ٹیل
اجزاء:
قلفہ آئس کریم آدھا لیٹر، فروٹ کاک ٹیل ایک عدد، کریم ایک پیکٹ، سُرخ جیلی ایک پیکٹ، چینی پِسی ہوئی چار کھانے کے چمچ، بادام، پستہ ایک کپ باریک کٹا ہوا۔
ترکیب:
سب سے پہلے دو کپ ابلتے پانی سُرخ جیلی ڈال کرپکائیں اور فریج میں ٹھنڈا کر کے چوکور ٹکڑوں میں کاٹ لیں۔ اب ایک برتن میں قلفہ آئس کریم، پِسی ہوئی چینی اور کریم مکس کرلیں۔ اس کے بعد، اس میں فروٹ کاک ٹیل اور جیلی شامل کردیں۔ اوپر بادام، پستے ڈال کر دو گھنٹے کے لیے فریج میں رکھیں۔ مزے دار فروٹ کاک ٹیل تیار ہے۔
