فرمان الہی
نماز کے اوقات
پاکستانی ڈرامہ اور فلم انڈسٹری کے 2 مقبول اور باصلاحیت بہن بھائی، شہزاد شیخ اور مومل شیخ کا تعلق ایک مضبوط میڈیا بیک گراؤنڈ سے ہے، وہ معروف اداکار جاوید شیخ کے بچے ہیں، جو پاکستان کی ٹی وی اور فلم انڈسٹری میں ایک بڑا نام رکھتے ہیں۔
شہزاد شیخ نے ڈرامہ انڈسٹری میں اپنی منفرد پہچان بنائی ہے، دوسری طرف مومل شیخ نے بھی کئی مشہور ڈراموں میں شاندار اداکاری کی ہے۔
حالیہ دنوں میں شہزاد اور مومل نجی ٹی وی کی رمضان نشریات میں مہمان بنے، اس پروگرام میں انہوں نے اس بارے میں گفتگو کی کہ اسٹار کڈز ہونے کے باوجود انہوں نے کن مشکلات کا سامنا کیا اور اپنی کامیابی کے لیے کتنی محنت کرنا پڑی۔
شہزاد شیخ نے کہا کہ میرا خیال ہے کہ مشہور شخصیت کے بچوں کے لیے اس پسِ منظر کے زیادہ نقصانات ہیں بجائے فوائد کے، کیونکہ لوگ ہم سے بہت زیادہ توقعات رکھتے ہیں، جب آپ کسی اداکار کے بچے ہوتے ہیں تو آپ کو پلیٹ فارم تو آسانی سے مل جاتا ہے، لیکن اداکاری آپ اپنے والدین سے نہیں سیکھ سکتے، آخر میں آپ کو اپنی جدوجہد خود ہی کرنی ہوتی ہے۔
انہوں نے کہا میرے والد نے مجھے ہمیشہ یہ نصیحت کی کہ محنت اور جدوجہد ہی پائیدار کامیابی کی بنیاد ہے، انہوں نے مجھے بتایا کہ شہرت ایک لمحے میں آ سکتی ہے، لیکن اگر تم کامیاب ہونا چاہتے ہو، تو تمہیں محنت اور سیکھنے کا سفر خود طے کرنا ہو گا، انہوں نے انڈسٹری میں جینے کے قیمتی اصول سکھائے، جو میرے لیے بہت مددگار ثابت ہوئے۔
مومل شیخ نے بھی اس سے متعلق اپنی رائے کا اظہار کیا، ان کا کہنا ہے کہ ہمیں بہت زیادہ محنت کرنا پڑی تاکہ ہم پر صرف جاوید شیخ کے بچے کا لیبل نہ لگے، بلکہ لوگ ہمیں ہماری اپنی پہچان سے جانیں، ہمیں اپنی جگہ خود بنانی پڑی اور یہ ثابت کرنا پڑا کہ ہم اپنی محنت اور ٹیلنٹ سے یہاں تک پہنچے ہیں، نہ کہ صرف ایک بڑے اداکار کے بچوں کی حیثیت سے۔
