فرمان الہی
نماز کے اوقات
گزشتہ روز شام کے مغربی علاقے درعا پر ہونے اسرائیلی حملوں میں 6 افراد جاں بحق اور متعدد زخمی ہو گئے۔
غیر ملکی خبر ایجنسی کے مطابق شام کی وزارتِ خارجہ نے اسرائیلی حملے کی مذمت کرتے ہوئے اسے قومی خود مختاری اور بین الاقوامی قانون کی صریح خلاف ورزی قرار دیا ہے۔
انہوں نے شام کے شہریوں کے خلاف اسرائیلی جرائم کی بین الاقوامی تحقیقات کا مطالبہ کیا ہے۔
خبر ایجنسی کے مطابق سرحدی علاقے میں تشدد اسرائیل اور شام کے درمیان بڑھتے ہوئے تصادم کی نشاندہی کرتا ہے، جہاں گزشتہ دسمبر میں باغیوں کی جانب سے سابق رہنما بشار الاسد کو اقتدار سے ہٹانے کے بعد ایک نئی اسلام پسند قیادت قائم کی گئی ہے۔
ادھر اسرائیلی کارروائی پر قطر اور سعودی عرب کی جانب سے سخت مذمت کی گئی ہے۔
دوسری جانب یمن کے شمالی علاقوں پر امریکا کے حملے جاری ہیں۔
حوثی میڈیا کے مطابق گزشتہ چند گھنٹوں میں صعدہ پر 17 اور عمران کے السفیان ضلع پر 2 فضائی حملے کیے گئے ہیں۔
حوثیوں نے بھی بحیرۂ احمر میں امریکی جنگی بحری جہازوں، بشمول طیارہ بردار بحری جہاز یو ایس ایس ہیری ٹرومن اور اسرائیل کے فوجی مراکز پر ڈرون حملے کیے ہیں۔
حوثی ترجمان کا کہنا ہے کہ امریکی جارحیت کے خلاف مزاحمت جاری رکھیں گے اور اسرائیلی جہاز رانی کو روکنے، غزہ پر حملے اور محاصرے کے خاتمے تک اسرائیل کے خلاف حملے جاری رکھیں گے۔
