فرمان الہی
نماز کے اوقات
بانی پاکستان تحریک انصاف (پی ٹی آئی) کے ترجمان نیاز اللّٰہ نیازی نے کہا ہے کہ 26ویں آئینی ترمیم سے عدلیہ کی آزادی چھین لی گئی۔
اڈیالہ جیل راولپنڈی کے باہر میڈیا سے گفتگو میں نیاز اللّٰہ نیازی نے کہا کہ ہماری فہرست میں سے صرف بیرسٹر گوہر اور سلمان صفدر کی ملاقات کروائی گئی۔
انہوں نے کہا کہ اسلام ہائیکورٹ کے فیصلے کے بعد فیملی کی صرف ایک ملاقات کروائی گئی، بطور فوکل پرسن میں نے 8 بار لسٹ اڈیالہ جیل حکام کو بھیجی، صرف 2 بار ملاقات کروائی گئی۔
بانی پی ٹی آئی کے ترجمان نے مزید کہا کہ ہائیکورٹ کو بتانا چاہتے ہیں کہ لارجر بینچ کے فیصلے کی توہین کی جا رہی ہے، 26ویں ترمیم سے عدلیہ کی آزادی چھین لی گئی ہے۔
اُن کا کہنا تھا کہ لسٹ کے بغیر فیصل چوہدری، علی عمران شہزاد، رائے سلمان کھرل کو ملاقات کےلیے بھیجا گیا۔
نیاز اللّٰہ نیازی نے یہ بھی کہا کہ ہائی کورٹ کے فیصلے کے مطابق جو لسٹ دی جاتی ہے، اس کیخلاف ورزی کیوں کی جاتی ہے، ملاقات کرنے والوں کی لسٹ کے کوآرڈینیٹر سلمان اکرام راجا کو اڈیالہ جیل کے باہر روکا گیا۔
انہوں نے کہا کہ ہمارے جنرل سیکرٹری سلمان اکرام راجا اور ترجمان کو کیوں نہیں جانے دیا گیا، جیل حکام نے عدالت کے سامنے ملاقات کی یقین دہانی کروائی پھر خلاف ورزی کیوں۔
بانی پی ٹی آئی کے ترجمان نے کہا کہ بلوچستان اور کے پی پر بانی پی ٹی آئی کا موقف آکر بتایا جس کے بعد ملاقات نہیں کرنے دی گئی، ہم وکلا کے کنونشن کی طرف جانا چاہتے ہیں۔
