فرمان الہی
نماز کے اوقات
بھارتی جیل میں بند سکیش چندرشیکھر نے جیکولین فرنینڈس کے نام جذباتی پیغام لکھا ہے جس میں انہوں نے اداکارہ کے لیے جزیرہ بالی پر زمین خریدنے کا انکشاف کیا ہے۔
بالی ووڈ کی نامور اداکارہ جیکولین فرنینڈس کے مبینہ بوائے فرینڈ اور 200 کروڑ روپے کے منی لانڈرنگ کیس میں گرفتار ملزم سکیش چندرشیکھر نے جیل سے ایک دل کو چھو لینے والا پیغام جاری کیا ہے، جس میں انہوں نے اداکارہ کے ساتھ اپنی دیرینہ وابستگی اور ان کی آنجہانی والدہ کے لیے گہری عقیدت کا اظہار کیا ہے۔
سکیش چندر شیکھر نے اپنے تازہ پیغام میں انکشاف کیا ہے کہ میں نے انڈونیشیا کے معروف سیاحتی جزیرے بالی میں ایک ایسی زمین خریدی ہے جہاں پہلے زرعی سرگرمیاں جاری تھیں، اب اس جگہ کو ایک خوبصورت نجی باغ میں تبدیل کر دیا گیا ہے، جسے میں نے جیکولین کی والدہ کم فرنینڈس کی یاد میں کمز گارڈن بائی جیکولین فرنینڈس کا نام دیا ہے۔
سکیش کا کہنا ہے کہ یہ باغ ایسٹر کے موقع پر جیکولین کے لیے ایک تحفہ ہے، جو ناصرف ان کی والدہ کی یاد کو تازہ رکھے گا بلکہ اداکارہ کے لیے ایک پرامن پناہ گاہ بھی ہو گا۔
اپنے پیغام میں انہوں نے لکھا ہے کہ میں جانتا ہوں کہ تم کس درد سے گزر رہی ہو اور میں ہر لمحہ تمہارے ساتھ ہوں، تمہاری والدہ ایک عظیم خاتون تھیں اور مجھے یقین ہے کہ وہ دوبارہ تمہاری بیٹی کے روپ میں جنم لیں گی۔
سکیش نے دعویٰ کیا ہے کہ جیکولین کے اردگرد موجود کئی افراد مفادات کے تحت ان کے قریب ہیں، جبکہ میں دل سے اور بے غرضی کے ساتھ ان کا ساتھ دے رہا ہوں۔
یاد رہے کہ سکیش چندرشیکھر اور جیکولین کے درمیان محبت کے مبینہ تعلقات ایک طویل عرصے سے خبروں میں ہیں، سکیش پر الزام ہے کہ وہ اداکارہ کو قیمتی تحائف، زیورات اور پرتعیش اشیاء دیتا رہا ہے جن کی مالیت کروڑوں روپے میں ہے۔
دوسری جانب جیکولین فرنینڈس اس وقت متعدد فلمی منصوبوں اور برانڈز کی تشہیر میں مصروف ہیں۔
اداکارہ کے قریبی ذرائع کے مطابق وہ سکیش کے کسی بھی بیان یا پیغام پر تبصرہ کرنے سے گریزاں ہیں اور اس وقت صرف اپنے پیشہ ورانہ کیریئر پر توجہ مرکوز کیے ہوئے ہیں۔
