پاکستان مسلم لیگ (ن) جاپان کے سرپرستِ اعلیٰ رانا ابرار احمد نے کہا ہے کہ پاکستان ہماری پہچان، فخر اور ایمان کا حصہ ہے اور اس کےلیے تن من، دھن کی ہر قربانی دینے کو تیار ہیں۔
انہوں نے ان خیالات کا اظہار مسلم لیگ (ن) جاپان کے وفد سے ملاقات کے دوران کیا، جس میں پارٹی کے چیئرمین ملک یونس، سیکریٹری جنرل شمز بٹ، نائب صدر مرزا اکرم اور دیگر عہدیداران شامل تھے۔
رانا ابرار احمد نے کہا کہ حالیہ پاک بھارت کشیدگی میں دشمن کی طرف سے داغا گیا ایک میزائل ان کے آبائی شہر مریدکے میں ان کے گھر کے قریب آ گرا، لیکن اس کے باوجود اہلِ علاقہ نے خوف کے بجائے جذبہ حب الوطنی کا مظاہرہ کیا، لوگ گھروں سے باہر نکلے، پاکستان زندہ باد کے نعرے لگائے اور دشمن کو پیغام دیا کہ پاکستانی قوم کسی دھمکی سے گھبرانے والی نہیں۔
اس موقع پر ن لیگ جاپان کے چیئرمین ملک یونس نے کہا کہ بیرونِ ملک بسنے والے پاکستانیوں کا جذبہ کسی سے کم نہیں اور جاپان میں موجود ن لیگی کارکن پارٹی کا قیمتی اثاثہ ہیں۔
ملک یونس نے پارٹی کے صدر ملک نور اعوان اور ان کی ٹیم کی مسلسل جدوجہد اور حب الوطنی کو سراہا۔
پارٹی کے جنرل سیکریٹری شمس بٹ نے مسلم لیگ ن کی مرکزی قیادت کو حالیہ سیاسی کامیابیوں پر مبارک باد پیش کی اور کہا کہ پارٹی کی قیادت، خصوصاً نواز شریف اور وزیرِ اعظم شہباز شریف کی مدبرانہ قیادت میں پاکستان ترقی کی راہ پر گامزن ہے۔
انہوں نے پاکستان کی مسلح افواج کو بھی خراجِ تحسین پیش کیا اور کہا کہ افواجِ پاکستان مادرِ وطن کے تحفظ کی ضمانت ہیں اور پوری قوم ان کے ساتھ کھڑی ہے۔
ملاقات کے اختتام پر وفد نے رانا ابرار احمد کی اہلیہ کے انتقال پر گہرے رنج و غم کا اظہار کیا اور مرحومہ کے ایصالِ ثواب کےلیے اجتماعی دعا کی۔
رانا ابرار نے تعزیت کرنے والے تمام احباب کا شکریہ ادا کیا اور کہا کہ پاکستانی قوم ایک جسم کی مانند ہے، جو دکھ اور خوشی میں ایک ساتھ کھڑی ہوتی ہے۔