پاکستان ایئر فورس کی سنہری تاریخ

10 اپریل 1959 کی رات تھی۔ پاکستان بھر میں عیدالفطر کا دن منایا جا چکا تھا۔ راولپنڈی میں فضا خاموش تھی، مگر ریڈار پر ایک مشکوک نشان تیزی سے پاکستان کی فضائی حدود کی طرف بڑھ رہا تھا۔ یہ کوئی اور نہیں بلکہ بھارتی فضائیہ کا Canberra B(I)58 بمبار طیارہ تھا، جو پاکستان کے حساس علاقوں کی جاسوسی پر مامور تھا۔ ایئر بیس سے F-86 سیبر طیارے فوراً فضا میں بلند ہوئے۔ فلائٹ لیفٹیننٹ محمد یونس نے برق رفتاری سے کارروائی کی اور 47,500 فٹ کی بلندی پر بھارتی طیارے کو مار گرایا۔ دونوں پائلٹس زندہ گرفتار ہوئے اور یوں پاکستان ایئر فورس کی پہلی فضائی فتح درج ہو گئی۔یہ ایک آغاز تھا،ایسا آغاز جس نے آنے والے عشروں میں تاریخ کے اوراق کو سنہری اور دشمن کے لیے خفت آمیز یادوں سے بھر دیا۔

ستمبر 1965 کی جنگ، جب بھارت نے رات کے اندھیرے میں لاہور کے محاذ پر حملہ کیا، تب پاکستانی فضائیہ کا حقیقی امتحان شروع ہوا۔ صرف چند گھنٹوں میں PAF نے نہ صرف فضا کا کنٹرول سنبھال لیا بلکہ دشمن کے دل میں دہشت بھی بٹھا دی۔ چھ ستمبر کو اسکواڈرن لیڈر سرفراز رفیقی، علوفی خان اور دیگر ہوا بازوں نے Pathankot ایئر بیس پر حملہ کر کے 13 بھارتی طیارے تباہ کر دیئے۔ اسی رات اسکواڈرن لیڈر ایم ایم عالم نے سرگودھا کے محاذ پر فضائی تاریخ کا ناقابلِ یقین کارنامہ انجام دیا اور صرف 30 سیکنڈ میں پانچ بھارتی ہاکر ہنٹر طیارے مار گرائے۔

1965 کی پوری جنگ کے دوران پاکستان ایئر فورس نے 60 سے 75 بھارتی جنگی طیارے فضا میں مار گرائے۔ ان طیاروں میں MiG-21، Mystère، Hunter اور Gnat شامل تھے۔ یہ تعداد بین الاقوامی عسکری تجزیہ کاروں، جیسے کہ John Fricker اور Desmond Ball، کے مطابق بھی تسلیم شدہ ہے۔

دسمبر 1971 کی جنگ میں پاکستان دو محاذوں پر گھرا ہوا تھا۔ مشرقی پاکستان کی صورت حال نازک تھی، اور مغربی سرحد پر بھی دباؤ شدید ہو رہا تھا۔ اس کے باوجود پاکستان ایئر فورس نے زبردست مزاحمت کی۔ اس جنگ میں اسکواڈرن لیڈر عظیم داؤد پوتا، ایس ایم حفیظ، ریاض بٹ اور منصور ہاشمی جیسے پائلٹس نے دشمن کے کئی طیارے فضا میں نشانہ بنائے۔

1971 کی جنگ میں پاکستان ایئر فورس نے 14 سے 19 بھارتی طیارے مار گرائے، جن میں MiG-21، Su-7 اور Hawker Hunters شامل تھے۔ اگرچہ اس جنگ کے نتیجے میں مشرقی پاکستان الگ ہو گیا، لیکن مغربی محاذ پر PAF نے اپنی فضائی برتری برقرار رکھی۔

27 فروری 2019 وہ دن تھا جب بھارت کے’’بالاکوٹ حملے‘‘کے جواب میں پاکستان ایئر فورس نے دنیا کو حیران کر دیا۔ صبح کے وقت PAF نے’’آپریشن سوئفٹ ریٹارٹ‘‘لانچ کیا۔ JF-17 تھنڈر طیاروں نے بھارتی فضائی حدود کے قریب کارروائی کی، جسکے نتیجے میں دو بھارتی طیارے مار گرائے گئے۔ ایک MiG-21 Bison، جس کا پائلٹ ونگ کمانڈر ابھینندن گرفتار ہوا، اور دوسرا SU-30 یا Mirage-2000، جسکی تصدیق بھارت نے تو نہ کی، مگر بین الاقوامی ذرائع نے اسے مشتبہ نقصان تسلیم کیا۔پاکستان کی یہ کارروائی نہ صرف تکنیکی برتری کا ثبوت تھی، بلکہ اخلاقی فتح بھی تھی، جب گرفتار بھارتی پائلٹ کو امن کے پیغام کے طور پر واپس کر دیا گیا۔ یہ لمحہ عالمی سفارتی منظرنامے پر پاکستان کے وقار میں اضافے کا سبب بھی بنا۔

مئی 2025 پاکستان ایئر فورس کی تاریخ کا ایک اور یادگار باب لکھا گیا۔ بھارت نے’’آپریشن سندور‘‘کے نام سے پاکستان کے اندر محدود فضائی دراندازی کی کوشش کی، جس کا فوری اور فیصلہ کن جواب’’آپریشن بنیان مرصوص‘‘کے تحت دیا گیا۔اس کارروائی میں پاکستانی JF-17 بلاک تھری،J-10C، F-16، اور شاہین اسکواڈرن کے ہوا بازوں نے پانچ سے چھ بھارتی طیارے مار گرائے۔ ان میں تین Rafale، ایک MiG-29، اور دو Su-30 طیارے شامل تھے۔ بین الاقوامی میڈیا جیسے کہ Reuters، Al Jazeera اور AP نے کم از کم دو طیاروں کی تباہی کی تصدیق کی۔ پاکستانی پائلٹس فلائٹ لیفٹیننٹ خرم زیدی، سجاد خان اور وِنگ کمانڈر عاصم بلال نے یہ کارروائیاں انجام دیں۔یہ حملہ نہ صرف تکنیکی برتری بلکہ جنگی اخلاقیات، بروقت فیصلہ سازی اور دفاعی حکمت عملی کی شاندار مثال بن کر ابھرا۔’’بنیان مرصوص‘‘کے دوران پاکستانی ایئر فورس نے نہ صرف دشمن کے عزائم خاک میں ملا دیے بلکہ دنیا کو یہ بھی یاد دلایا کہ پاکستان کی فضائی حدود کوئی خلا نہیں بلکہ محفوظ ترین قلعہ ہیں۔

پاک بھارت تاریخ میں اب تک کل تصدیق شدہ تعداد کے مطابق پاکستان بھارت کے بیاسی سے ایک سو تین جنگی طیارے تباہ کرچکا ہے۔پاکستان ایئر فورس کی تاریخ دشمن کے طیاروں کے ملبے سے لکھی گئی ہےجہاں ہر پرزہ ایک گواہی ہے اور ہر دھماکہ اس حقیقت کی گواہی دیتا ہے کہ جب تک فضا میں سبز ہلالی پرچم لہراتا رہے گا، دشمن کا غرور خاک میں ملتا رہے گا۔پاکستان ائیر فورس صرف ایک ایئر فورس نہیں، بلکہ ایک نظریہ، ایک عزم، اور ایک محافظِ وطن جذبہ ہے، جو ہر وار کو پلٹ کر دشمن کی چھاتی میں اتارنے کی بھرپور صلاحیت رکھتا ہے۔ پاکستان زندہ باد۔