فرمان الہی
نماز کے اوقات
ہالینڈ میں عشرہ محرم الحرام بڑے احترام سے منایا گیا۔
تمام مکاتبِ فکر کے مسلمانوں نے نواسہ رسولﷺ جگر گوشہ بتولؓ، فرزند علی المرتضیؓ، حضرت امام حسینؓ اور دیگر خانوادہ رسولؐ کی کربلا کے ریگزار میں شہادتوں کی یاد میں مساجد اور امام بارگاہوں میں مجالسِ شہادت کانفرنسز کا انعقاد کیا۔
حسینی مشن نیدر لینڈز کے زیر اہتمام امام بارگاہ محفل علیؓ دی ہیگ میں مجالس کا اہتمام کیا گیا، جس کی نظامت کے فرائض سید اعجاز حسین سیفی نے ادا کیے جبکہ مقامی ذاکرین شعراء سید علی اقبال، سید توصیف حسین، عون رانا، ابراہیم پاشا، تنویر حیدر، پرویز زیدی، شریف اللّٰہ خان نے منظوم خراج عقیدت پیش کیا۔
تعزیہ تابوت حضرت علم عباسؓ جلوسِ عزا کا بھی اہتمام کیا گیا جس میں ہزاروں افراد نے شرکت کی۔ جلوس میں پاکستانی عزداروں کے علاوہ ترکش، ایرانی، عراقی، افغانی، شیعان حیدر کرار نے بھی کثیر تعداد میں شرکت کی۔
پاکستان کے معروف شیعہ عالم دین علامہ غلام اکبر ساقی نے خطاب کرتے ہوئے کہا کہ امت مسلمہ کو فکر حسینیؓ کو اپنانا ہوگا۔ انہوں مختلف ایام میں فضائل و مصائبِ شہداۓ کربلا بیان کیے اور داستان غم اس انداز سے سنائی کہ ہر آنکھ نواسہ رسولؐ کے غم میں پر نم تھی۔
نیدرلینڈز میں حسینی مشن گزشتہ 50 برس سے دی ہیگ میں عزاداری جبکہ گزشتہ 30 سال سے جلوس عزا کا اہتمام کر رہی ہے۔
تمام تر انتظامات کو بجا لانے میں سید عظمت عباس، سید سہیل شاہ، سید اعجاز سیفی، حاجی کاظم حسین سید ولایت حسین شاہ سید آفاق جعفری، سید امیر الحسن بخاری، سید حسن عسکری نقوی، مظہر علی خان، سید عامر ٹینو، سید توصیف حسین معاونت کرتے ہیں۔
معروف نوحہ خواں سید ندیم سرور کے صاحبزادوں سید علی شناور اور سید علی جی نے نوحہ خوانی کی جبکہ ایمسٹر ڈیم میں ادارہ جعفریہ نے مجالس عزاء کا انعقاد کیا۔
برطانیہ سے آئے بزرگ عالم دین مولانا سید سجاد حسین نقوی نے خطاب کرتے ہوئے کہا کہ حضرت امام حسینؓ نے دین اسلام کی آبیاری کے لیے عظیم قربانی دے کر اپنے نانا کے دین کو ہمیشہ کے لیے زندہ کر دیا۔
