فرمان الہی
نماز کے اوقات
وزیرِاعلیٰ پنجاب مریم نواز شریف نے کہا کہ بنگلادیشی سرمایہ کاروں کو پاکستان میں ون ونڈو بزنس سینٹرز کے ذریعے سہولت دی جائے گی۔
وزیرِاعلیٰ پنجاب سے پاکستان میں بنگلادیش کے ہائی کمشنر اقبال حسین خان کی ملاقات ہوئی۔ اس دوران دوطرفہ تعاون، باہمی تجارت، صنعت اور زراعت میں تعاون بڑھانے پر اتفاق کیا گیا۔
اس موقع پر مریم نواز نے کہا کہ پاکستان اور بنگلادیش ایک ہی درخت کی 2 شاخیں ہیں۔
ان کا کہنا تھا کہ ویمن فرسٹ ایجنڈے کے تحت پروگرامز میں اشتراک کا خیرمقدم کیا کریں گے، وژن 2030ء ویمن فرسٹ سمٹ میں شرکت ہمارے لیے اعزاز ہے۔ بنگلادیش کی گارمنٹس اور مائیکروفنانس میں ویمن ورک فورس کی کامیابیاں قابل قدر ہیں۔
مریم نواز نے کہا کہ پنجاب اور بنگلادیش کے درمیان زراعت اور فوڈ سیکیورٹی کے شعبے میں تعاون کی گنجائش ہے، پنجاب جنوری میں بنگلادیش کو 50 ہزارٹن اعلیٰ معیار کا چاول برآمد کر چکا ہے، میڈیکل ڈیوائسز کے لیے بنگلادیش کو سستی اور مشترکا برانڈنگ کا موقع دے سکتے ہیں، بنگلادیش کی جانب سے ویزا کلیئرنس میں آسانی اور انسپیکشن میں نرمی مثبت قدم ہے۔
مریم نواز نے یہ بھی کہا کہ ڈھاکا ایئرپورٹ سیکیورٹی ڈیسک ختم کرنے جیسے اقدامات باہمی اعتماد کی نشانی ہیں، لاہور اور ڈھاکا میں پاکستان بنگلادیش جوائنٹ چیمبر آف کامرس کے قیام کا خیر مقدم کرتے ہیں۔
